நெதர்லாந்தில் வேலைவாய்ப்புகளைப் பெற்றுத் தருவதாகக் கூறி, சில தரப்பினர் மக்களை ஏமாற்றி வருவதாக இலங்கைக்கான நெதர்லாந்து தூதரகம் எச்சரிக்கை விடுத்துள்ளது.
இவ்வாறான மோசடித் திட்டங்கள் தொடர்பில் தகவல்கள் கிடைத்துள்ளதாகவும், ஏற்கனவே சிலர் இத்தகைய மோசடிகளுக்கு இரையாகியுள்ளதாகவும் தூதரகம் தெரிவித்துள்ளது.
குறிப்பாக, நெதர்லாந்தின் குடிவரவு மற்றும் இயற்கைமயமாக்கல் சேவை (IND) உத்தியோகபூர்வமாக வெளியிடும் கடிதங்களைப் போன்ற போலி ஆவணங்கள் தயாரிக்கப்பட்டு விநியோகிக்கப்படுவதாகவும் தூதரகம் சுட்டிக்காட்டியுள்ளது.
நெதர்லாந்தில் அனைத்து வகையான வேலைவாய்ப்புகளுக்கும் பணி விசா வழங்கப்படுவதில்லை எனவும், குறிப்பிட்ட சில சூழ்நிலைகளில் மாத்திரமே அதற்கான வாய்ப்புகள் உள்ளதாகவும் தூதரகம் தெளிவுபடுத்தியுள்ளது.
குறிப்பாக, உயர் திறன்சார் தொழில்கள் மற்றும் மேம்பட்ட தொழில்நுட்பத்துடன் தொடர்புடைய துறைகளில் உண்மையான வேலைவாய்ப்புகள் காணப்படக்கூடும் எனத் தெரிவித்துள்ள தூதரகம், ஏனைய வேலைவாய்ப்பு அறிவிப்புகள் தொடர்பில் பொதுமக்கள் மிகுந்த அவதானத்துடன் செயற்படுமாறும் அறிவுறுத்தியுள்ளது.
மேலும், நெதர்லாந்தில் வேலைவாய்ப்புகளைப் பெற்றுக்கொடுப்பதற்காகத் தூதரகம் எவரையும் ஆட்சேர்ப்பு செய்வதில்லை என்றும் தெரிவித்துள்ளது.
எனவே, வேலைவாய்ப்புகளைப் பெற்றுக்கொள்வதாகக் கூறி பணம் செலுத்துவதற்கு முன்னர், சம்பந்தப்பட்ட நிறுவனங்களுடன் நேரடியாகத் தொடர்புகொண்டு வேலைவாய்ப்பு தொடர்பான தகவல்களை உறுதிப்படுத்திக்கொள்ளுமாறு இலங்கையர்களிடம் தூதரகம் கேட்டுக்கொண்டுள்ளது.
அத்துடன், இவ்வாறான மோசடிகளை எதிர்கொள்ளும் நபர்கள் உடனடியாக இலங்கையின் சட்ட அமுலாக்க அதிகாரிகளிடம் சட்ட உதவியை நாடுமாறும் தூதரகம் அறிவுறுத்தியுள்ளது.
