இலங்கை அரசாங்கத்தின் வரியல்லா வருமானம், கடந்த ஆண்டின் இதே காலப்பகுதியுடன் ஒப்பிடுகையில் இந்த ஆண்டின் முதல் எட்டு மாதங்களில் குறிப்பிடத்தக்க அளவில் அதிகரித்துள்ளது.
2027ஆம் ஆண்டுக்கான வரவு செலவுத் திட்டம், பொருளாதாரம் மற்றும் நிதி நிலைமை தொடர்பான அறிக்கையில் இந்த விடயம் தெரிவிக்கப்பட்டுள்ளது.
இதன்படி, 2026ஆம் ஆண்டின் முதல் எட்டு மாதங்களில் அரசாங்கத்தின் வரியல்லா வருமானம் 39.1 சதவீதத்தால் அதிகரித்து 314.8 பில்லியன் ரூபாவாகப் பதிவாகியுள்ளது.
கடந்த 2025ஆம் ஆண்டின் இதே காலப்பகுதியில் இந்த வருமானம் 226.2 பில்லியன் ரூபாவாகக் காணப்பட்டது.
இந்தக் காலப்பகுதியில் அரசாங்கத்தின் மொத்த வருமானத்தில் வரியல்லா வருமானம் 7.9 சதவீதமாகப் பங்களித்துள்ளது.
இலங்கை மத்திய வங்கியிடமிருந்து கிடைத்த 42.1 பில்லியன் ரூபாய் இலாபப் பரிமாற்றம் உள்ளிட்ட இலாபங்கள் மற்றும் பங்காதாயங்கள், வாடகை வருமானம், அபராதங்கள், கட்டணங்கள், வட்டி வருமானம் மற்றும் சமூகப் பாதுகாப்புப் பங்களிப்புகள் அதிகரித்தமையே இந்த வளர்ச்சிக்கு முக்கிய காரணமாக அமைந்துள்ளது.
இதன்படி, வட்டி வருமானம் கடந்த ஆண்டின் முதல் எட்டு மாதங்களில் 43.4 பில்லியன் ரூபாவாகக் காணப்பட்ட நிலையில், இவ்வாண்டு 19.1 சதவீதத்தால் அதிகரித்து 51.7 பில்லியன் ரூபாவாகப் பதிவாகியுள்ளது.
அதேவேளை, அபராதங்கள் மற்றும் ஏனைய கட்டணங்கள் மூலம் கிடைத்த வருமானம் 18.7 சதவீதத்தால் அதிகரித்து 133.6 பில்லியன் ரூபாவாக உயர்ந்துள்ளது. கடந்த ஆண்டு இதே காலப்பகுதியில் இந்த வருமானம் 112.6 பில்லியன் ரூபாவாகக் காணப்பட்டது.
மேலும், மோட்டார் போக்குவரத்துத் திணைக்களம், குடிவரவு மற்றும் குடியகல்வு திணைக்களம் மற்றும் ஆட்பதிவுத் திணைக்களம் ஆகியவற்றின் ஊடாக அறவிடப்படும் கட்டணங்கள் மற்றும் சேவைக் கட்டணங்கள் மூலமான வருமானமும் அதிகரித்துள்ளதாக அறிக்கையில் குறிப்பிடப்பட்டுள்ளது.
அரச துறை ஊழியர்களின் சம்பள அதிகரிப்பு மற்றும் சமூகப் பாதுகாப்புப் பங்களிப்பு வீதம் உயர்த்தப்பட்டமை காரணமாக, இந்தப் பங்களிப்புகள் மூலம் அரசாங்கத்திற்குக் கிடைக்கும் வருமானமும் அதிகரித்துள்ளது.
இதன்படி, சமூகப் பாதுகாப்புப் பங்களிப்புகள் மூலம் கிடைத்த வருமானம் கடந்த ஆண்டின் முதல் எட்டு மாதங்களில் 36.6 பில்லியன் ரூபாவாகக் காணப்பட்ட நிலையில், இவ்வாண்டு 45.3 பில்லியன் ரூபாவாக அதிகரித்துள்ளது.
இதேவேளை, வாடகை வருமானம் 31.8 சதவீதத்தால் அதிகரித்துள்ளது. கடந்த 2025ஆம் ஆண்டின் முதல் எட்டு மாதங்களில் 3.9 பில்லியன் ரூபாவாகக் காணப்பட்ட இந்த வருமானம், இவ்வாண்டு 5.1 பில்லியன் ரூபாவாக உயர்ந்துள்ளது.
அத்துடன், அரசுக்குச் சொந்தமான நிறுவனங்களிடமிருந்து கிடைத்த இலாபங்கள் மற்றும் பங்காதாயங்கள் மூலம் பெறப்பட்ட வருமானமும் 36 சதவீதத்தால் அதிகரித்து 19.9 பில்லியன் ரூபாவாகப் பதிவாகியுள்ளது. கடந்த ஆண்டு இதே காலப்பகுதியில் இது 14.6 பில்லியன் ரூபாவாகக் காணப்பட்டது.
மேலும், 2026ஆம் ஆண்டுக்காக அரசாங்கம் நிர்ணயித்திருந்த 360 பில்லியன் ரூபாய் வரியல்லா வருமான இலக்கில், முதல் எட்டு மாதங்களுக்குள்ளேயே 87.4 சதவீதத்தை எட்டியுள்ளதாக குறித்த அறிக்கையில் தெரிவிக்கப்பட்டுள்ளது.
