எதிர்வரும் சுதந்திர தினத்தன்று காணாமல் ஆக்கப்பட்டவர்களின் உறவினர்களால் வவுனியாவில் முன்னெடுக்கப்படவிருந்த அடையாள உணவுத் தவிர்ப்புப் போராட்டத்திற்கு வவுனியா பொலிஸார் தடை கோரிய நிலையில் நீதிமன்றம் தடை உத்தரவு பிறப்பித்துள்ளது.
இது தொடர்பாக குறித்த போராட்டத்தை ஏற்பாடு செய்திருந்த வவுனியா மாவட்ட வலிந்து காணாமல் ஆக்கப்பட்டோரின் உறவுகள் சங்கத்தின் முக்கியஸ்தர்களிற்கு தடை உத்தரவு தொடர்பாக அறிவிக்கப்பட்டுள்ளது.
அந்தத் தடை உத்தரவுப் பத்திரத்தில் தெரிவிக்கப்பட்டுள்ளதாவது, “இன்று வவுனியா தலைமைப் பொலிஸ் நிலையத்தின் பிரதான பொலிஸ் பரிசோதகரால் பெப்ரவரி மூன்றாம் திகதியில் இருந்து எதிர்வரும் ஆறாம் திகதிவரை வவுனியா ஏ-9 வீதியிலோ அல்லது தபால் காரியாலயம் முன்பாகவோ, பழைய பேருந்து நிலையம் முன்பாகவோ 73 ஆவது தேசிய சுதந்திர தினத்திற்கு எதிப்புத் தெரிவித்து தடை செய்யப்பட்ட இயக்கமாக அறிவிக்கப்பட்ட தமிழீழ விடுதலைப் விடுதலைப் புலிகள் அமைப்பின், காணாமல் ஆக்கப்பட்ட உறவினர்களின் பிரச்சினை, அரசியல் கைதிகளை விடுவிக்காமை தொடர்பான கருத்துக்களை பிரதானமாக முன்வைத்து எதிர்ப்பு நடவடிக்கை செய்யவோ அல்லது ஆர்ப்பாட்டமோ, பாத யாத்திரை போன்றவற்றைச் செய்யவோ தடை உத்தரவு கேட்டு 1979/இல-15 குற்றவியல் நடவடிக்கை சட்டக் கோவை பிரிவு 106 (1) இன் படி நீதிமன்றிற்கு அறிக்கை இடப்பட்டுள்ளது.
நீதிமன்றிற்கு உட்படுத்திய சம்பவத்தைப் பரிசீலினை செய்து பார்த்து வவுனியா பழைய பேருந்து நிலையம் முன்பாகவோ, ஏ-9 பிரதான வீதியிலோ, தபால் காரியாலயம் முன்பாகவோ அல்லது வவுனியா மாவட்ட பொலிஸ் பிரதேசத்திலோ ஆர்ப்பாட்டமோ, பாத யாத்திரையோ செய்தால் கொரோனா வைரஸ் நிலைமையின் போது பொது சுகாதாரத்திற்கும் மக்களுக்கும் பாதிப்பு ஏற்படும் என அறிய முடிகிறது.
எனவே, குறித்த பிரதேசங்களில் மூன்றாம் திகதியில் இருந்து எதிர்வரும் ஆறாம் திகதி வரை 73 ஆவது தேசிய சுதந்திர தினத்திற்கு எதிர்ப்புத் தெரிவித்தும் 46 ஆவது ஜக்கிய நாடுகள் மனித உரிமை அமர்வை இலக்காக கொண்டு செய்யப்படுகின்றது என்று குற்றஞ்சாட்டப்பட்ட ஆர்ப்பாட்டம் அல்லது பாத யாத்திரை அல்லது வேறு குற்றச் செயற்பாடுகள் செய்யக்கூடாதென சண்முகராஜ் சறோஜாதேவி, சிவநாதன் ஜெனிற்றா, காசிப்பிள்ளை ஜெயவனிதா, கிறிஸ்தோப்பு கிருஸ்ணன்டயஸ் இராசமடு ஆகியவர்களுக்கு 1979/இல-15 குற்றவியல் நடவடிக்கை சட்டக் கோவை பிரிவு 106 (1) இன் கீழ் கட்டளையிடப்படுகின்றது.
இது சம்பந்தமாக கருத்துக்கூற 2021.02.15 அன்று காலை ஒன்பது மணிக்கு நீதிமன்றிற்கு முற்படுமாறு கட்டளையிடுகிறேன்” என குறித்த உத்தரவில் தெரிவிக்கப்பட்டுள்ளது.
