பாகிஸ்தான் சுப்பர் லீக்: முல்தான் சுல்தான்ஸ் அணி வெற்றி!

பாகிஸ்தான் சுப்பர் லீக் ரி-20 தொடரின் 16ஆவது லீக் போட்டியில், முல்தான் சுல்தான்ஸ் அணி 12 ஓட்டங்களால் வெற்றிபெற்றுள்ளது.

அபுதாபி மைதானத்தில் நேற்று (வியாழக்கிழமை) நடைபெற்ற இப்போட்டியில், முல்தான் சுல்தான்ஸ் அணியும் கராச்சி கிங்ஸ் அணியும் மோதின.

இப்போட்டியில் நாணய சுழற்சியில் வெற்றிபெற்ற கராச்சி கிங்ஸ் அணி, முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய முல்தான் சுல்தான்ஸ் அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 176 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, ரொஸ்சொவ் 44 ஓட்டங்களையும் குஸ்தில் ஆட்டமிழக்காது 44 ஓட்டங்களையும் மசூத் 31 ஓட்டங்களையும் பெற்றுக்கொண்டனர்.

கராச்சி கிங்ஸ் அணியின் பந்துவீச்சில், திசர பெரேரா 2 விக்கெட்டுகளையும் இமாட் வசிம் மற்றும் மக்சூத் ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து 177 என்ற வெற்றி இலக்கை நோக்கி பதிலுக்கு களமிறங்கிய கராச்சி கிங்ஸ் அணியால், 20 ஓவர்கள் நிறைவில் 7 விக்கெட்டுகள் இழப்புக்கு 164 ஓட்டங்களை மட்டுமே பெற முடிந்தது. இதனால் முல்தான் சுல்தான்ஸ் அணி 12 ஓட்டங்களால் வெற்றிபெற்றது.

இதன்போது அணியின் அதிகப்பட்ச ஓட்டங்களாக, பாபர் அசாம் ஆட்டமிழக்காது 85 ஓட்டங்களையும் சாட்விக் வோல்டன் 35 ஓட்டங்களையும் பெற்றுக்கொண்டனர்.

முல்தான் சுல்தான்ஸ் அணியின் பந்துவீச்சில், இம்ரான் கான் 3 விக்கெட்டுகளையும் இம்ரான் தஹீர் 2 விக்கெட்டுகளையும் வீழ்த்தினர்.

இப்போட்டியின் ஆட்டநாயகனாக, 24 பந்துகளில் 7 பவுண்ரிகள் அடங்களாக 44 ஓட்டங்களை பெற்றுக்கொண்ட ரொஸ்சொவ் தெரிவுசெய்யப்பட்டார்.