பர்முயுலா-1 கார்பந்தயத்தின் ஸ்டீயர்மார்க் கிராண்ட் பிரிக்ஸ் சுற்றில், ரெட் புல் அணியின் வீரரான மேக்ஸ் வெர்ஸ்டபேன் முதலிடம் பிடித்துள்ளார்.
ஒவ்வொரு ஆண்டும் ‘பார்முலா 1’ கார் பந்தயம், 23 சுற்றுகளாக நடைபெறும். ஒவ்வொரு சுற்றும் ஒவ்வொரு நாடுகளில் நடைபெறும்.
இதன்படி, நடப்பு ஆண்டின் எட்டாவது சுற்றான ஸ்டீயர்மார்க்; கிராண்ட் பிரிக்ஸ், நேற்று ரெட் புல் சர்வதேச ஓடுதளத்தில் நடைபெற்றது.
இதில் 306.452 கிலோ மீட்டர் பந்தய தூரத்தை நோக்கி, 10 அணிகளை சேர்ந்த 20 வீரர்கள் காரில் சீறிப்பாய்ந்தனர்.
இதில் ரெட் புல் அணியின் மேக்ஸ் வெர்ஸ்டபேன், பந்தய தூரத்தை 1 மணித்தியாலம் 22 நிமிடங்கள் 18.925 வினாடிகளில் இலக்கை கடந்து முதலிடத்தை பிடித்தார். இதற்காக அவருக்கு 25 புள்ளிகள் வழங்கப்பட்டது.
அவரை விட 35.743 வினாடிகள் பின்தங்கிய நிலையில், பந்தய தூரத்தை கடந்த, மெசிடஸ் பென்ஸ் அணியின் வீரரும் நடப்பு சம்பியனுமாகிய லீவிஸ் ஹெமில்டன் இரண்டாவது இடத்தை பெற்றார். அத்தோடு அவர், இரண்டாம் இடத்திற்கான 19 புள்ளிகளையும் பெற்றுக் கொண்டார்.
46.907 வினாடிகள் பின்தங்கிய நிலையில், பந்தய தூரத்தை கடந்த மெசிடஸ் பென்ஸ் அணியின் மற்றொரு வீரர் வல்டேரி போட்டாஸ், மூன்றாவது இடத்தை பிடித்தார். அதற்கு அவருக்கு 15 புள்ளிகள் வழங்கப்பட்டது.
இதுவரை நடைபெற்று முடிந்துள்ள எட்டு சுற்றுகளின் முடிவில், மேக்ஸ் வெர்ஸ்டபேன் நான்கு வெற்றிகளுடன் 156 புள்ளிகளுடன் முதலிடத்தில் உள்ளார்.
இதற்கு அடுத்தப்படியாக லீவிஸ் ஹெமில்டன் மூன்று வெற்றிகளுடன் 138 புள்ளிகளுடன் இரண்டாவது இடத்தில் உள்ளார்.
ரெட் புல் அணியின் செர்ஜியோ பெரெஸ் ஒரு வெற்றியுடன் 96 புள்ளிகளுடன் மூன்றாவது இடத்தில் உள்ளார்.
அடுத்த ஒன்பதாவது சுற்றான ஒஸ்திரியன் கிராண்ட் பிரிக்ஸ், அடுத்த மாதம் 4ஆம் திகதி, ரெட் புல் சர்வதேச ஓடுதளத்தில் நடைபெறவுள்ளது.
