சர்வதேச கிரிக்கெட்டில் இருந்து ஓய்வு பெறுவது குறித்து ஆலோசித்து வருவதாக இலங்கை அணி வீரர் அஞ்சலோ மத்யூஸ் இலங்கை கிரிக்கெட் சபைக்கு தெரிவித்துள்ளார்.
தற்போது இந்த விவகாரம் குறித்து பரிசீலித்து வருவதாகவும், எதிர்வரும் வாரங்களில் தனது முடிவை தெரிவிப்பதாகவும் 34 வயதான மத்யூஸ் தெரிவித்துள்ளார் என இலங்கை கிரிக்கெட் சபை வட்டார தகவல்கள் தெரிவிக்கின்றன.
இளம் வீரர்களுடன் கிரிக்கெட் அணியை கொண்டு செல்வதற்கு இலங்கை அணி நிர்வாகம் முடிவு செய்ததை அடுத்து அஞ்சலோ மத்யூஸ் வரையறுக்கப்பட்ட ஓவர்கள் கொண்ட தொடரில் உள்வாங்கப்படவில்லை.
2019 உலகக் கிண்ண கிரிக்கெட்டில் இலங்கையின் மிகச் சிறந்த வீரர்களில் ஒருவராக இருந்த அவர், 2018 ஆம் ஆண்டில் அவரது துடுப்பாட்ட சராசரியாக 52.50 ஆகவும், 2017 இல் 63.66 ஆகவும் இருந்தது.
இதேவேளை மத்யூஸின் பீல்டிங் மற்றும் உடற்பயிற்சி தரநிலைகள் 2020 ஆம் ஆண்டிலும் கணிசமாக முன்னேறியுள்ளன.
இந்நிலையில் புதிய ஒப்பந்த முறைமை தொடர்பாக மத்யூஸ் மற்றும் பல மூத்த கிரிக்கெட் வீரர்கள் ஆட்சேபனை தெரிவித்துள்ளமை குறிப்பிடத்தக்கது.
