சின்சினாட்டி பகிரங்க டென்னிஸ்: காலிறுதிப் போட்டிகளின் முடிவுகள்!

ஆண்கள் மற்றும் பெண்கள் பங்கேற்கும் சின்சினாட்டி பகிரங்க டென்னிஸ் தொடர், தற்போது விறுவிறுப்புக்கு பஞ்சமில்லாமல் நடைபெற்று வருகின்றது.

இதன்படி தற்போது காலிறுதிப் போட்டிகள் நடைபெற்று வருகின்றன. இதில் நடைபெற்று முடிந்த போட்டிகளின் முடிவுகளை பார்க்கலாம்.
முதலாவதாக ஆண்கள் ஒற்றையர் பிரிவு காலிறுதிப் போட்டிகளின் முடிவுகளை பார்க்கலாம்.

ஆண்களுக்கான ஒற்றையர் பிரிவு காலிறுதிப் போட்டியில், ஜேர்மனியின் அலெக்ஸான்டர் ஸ்வெரவ், நோர்வேயின் காஸ்பர் ரூட்டை எதிர்கொண்டார்.

பரபரப்பாக நடைபெற்ற இப்போட்டியில், அலெக்ஸான்டர் ஸ்வெரவ், 6-1, 6-3 என்ற நேர் செட் கணக்குகளில் வெற்றிபெற்று அரையிறுதிக்கு முன்னேறினார்.

ஆண்களுக்கான ஒற்றையர் பிரிவு காலிறுதிப் போட்டியில், கிரேக்கத்தின் ஸ்டெபீனோஸ் சிட்ஸிபாஸ், கனடாவின் பெலிக்ஸ் ஆகர் அலியாசிமுடன் மோதினார்.

விறுவிறுப்பாக நடைபெற்ற இப்போட்டியில், ஸ்டெபீனோஸ் சிட்ஸிபாஸ், 6-2, 5-7, 6-1 என்ற செட் கணக்குகளில் வெற்றிபெற்று அரையிறுதிக்கு தகுதிபெற்றார்.

ஆண்களுக்கான ஒற்றையர் பிரிவு காலிறுதிப் போட்டியில், ரஷ்யாவின் டேனில் மெட்வேடவ், ஸ்பெயினின் பப்லோ கரினோ புஸ்டாவுடன் பலப்பரீட்சை நடத்தினார்.

இப்போட்டியில், 6-1, 6-1 என்ற நேர் செட் கணக்குகளில் டேனில் மெட்வேடவ் எளிதாக வெற்றிபெற்று அரையிறுதிக்குள் நுழைந்தார்.

இதேபோல பெண்களுக்கான ஒற்றையர் பிரிவு காலிறுதிப் போட்டியில், செக்குடியரசின் கரோலினா பிளிஸ்கோவா, ஸ்பெயினின் பவுலா படோசாவுடன் மோதினார்.

இப்போட்டியில், முதல் செட்டை 7-5 என கரோலினா பிளிஸ்கோவா போராடிக் கைப்பற்றினார்.

தொடர்ந்து நடைபெற்ற இரண்டாவது செட்டில், கரோலினா பிளிஸ்கோவா, 2-0 என முன்னிலைப் பெற்றிருந்த போது பவுலா படோசா உபாதைக் காரணமாக போட்டியிலிருந்து வெளியேறினார்.

இதனால் கரோலினா பிளிஸ்கோவா வெற்றியாளராக அறிவிக்கப்பட்டு அரையிறுதிக்கு தகுதிபெற்றார்.

பெண்களுக்கான ஒற்றையர் பிரிவு காலிறுதிப் போட்டியில், சுவிஸ்லாந்தின் பெலின்டா பென்ஸிக்கும் சகநாட்டு வீராங்கனையான ஜில் டீச்மேனும் பலப்பரீட்சை நடத்தினர்.

இதில் யாரும் எதிர்பாராத வகையில் 6-3, 6-2 என்ற நேர் செட் கணக்குகளில் ஜில் டீச்மேன் வெற்றிபெற்று அரையிறுதிக்குள் அடியெடுத்து வைத்தார்.