பாகிஸ்தான் சுப்பர் லீக் ரி-20 தொடரின் 11ஆவது லீக் போட்டியில், பெஷாவர் சல்மி அணி, 9 ஓட்டங்களால் வெற்றிபெற்றுள்ளது.
கராச்சி மைதானத்தில் நேற்று (வெள்ளிக்கிழமை) நடைபெற்ற இப்போட்டியில், பெஷாவர் சல்மி அணியும் கராச்சி கிங்ஸ் அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற கராச்சி கிங்ஸ் அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய பெஷாவர் சல்மி அணி, நிர்ணயிக்கப்பட்ட 20 ஓவர்கள் நிறைவில் 4 விக்கெட்டுகள் இழப்புக்கு 173 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, சொயிப் மாலிக் ஆட்டமிழக்காது 52 ஓட்டங்களையும் ஹஸ்ரதுல்லா ஷசாய் 41 ஓட்டங்களையும் பெற்றுக்கொண்டனர்.
கராச்சி கிங்ஸ் அணியின் பந்துவீச்சில், ஆஷிப் 3 விக்கெட்டுகளையும் ஆமெர் யாமின் 1 விக்கெட்டினையும் வீழ்த்தினர்.
இதனைத்தொடர்ந்து 174 என்ற வெற்றி இலக்கை நோக்கி பதிலுக்கு களமிறங்கிய கராச்சி கிங்ஸ் அணியால், நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 164 ஓட்டங்களை மட்டுமே பெற முடிந்தது. இதனால், பெஷாவர் சல்மி 9 ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, பாபர் அசாம் ஆட்டமிழக்காது 90 ஓட்டங்களையும் இயன் கொக்பெய்ன் 31 ஓட்டங்களையும் பெற்றுக்கொண்டனர்.
பெஷாவர் சல்மி அணியின் பந்துவீச்சில், மொஹமட் உமர் 3 விக்கெட்டுகளையும் சொயிப் மலிக், ஹொசைன் தாலத் மற்றும் உஸ்மான் காதீர் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, 28 பந்துகளில் 2 சிக்ஸர்கள் 5 பவுண்ரிகள் அடங்களாக ஆட்டமிழக்காது 52 ஓட்டங்களை பெற்றுக்கொண்ட சொயிப் மாலிக் தெரிவுசெய்யப்பட்டார்.
