முன்னாள் ஜனாதிபதி மைத்திரிபால சிறிசேனவின் பணிக்குழாமின் முன்னாள் பிரதானி ஐ.எச்.கே. மஹானாம மற்றும் அரச மர கூட்டுத்தாபனத்தின் முன்னாள் தலைவர் பி. திஸாநாயக்க ஆகியோரின் சிறைத் தண்டனை உறுதி செய்து உயர் நீதிமன்றம் உத்தரவிட்டுள்ளது.
20 மில்லியன் ரூபாய் இலஞ்சம் பெற்ற குற்றச்சாட்டில் அவர்களுக்கு எதிராக தாக்கல் செய்யப்பட்ட வழக்கில் குற்றவாளிகள் என அடையாளம் காணப்பட்டு அவர்களுக்கு மூவரடங்கிய கொழும்பு நிரந்தர நீதாய மேல் நீதிமன்றத்தில் சிறைத்தண்டனை வழங்கியது.
அதற்கமைய, ஐ.எச்.கே. மஹானாமவுக்கு, 20 வருட கடூழிய சிறைத்தண்டனையும் 65,000 அபராதமும் பியதாஸ திஸாநாயக்கவுக்கு 12 வருட கடூழிய சிறைத் தண்டனையும் 55,000 ரூபாய் அபராதமம் விதிக்கப்பட்டது.
கடந்த 2018 ஆம் ஆண்டு மே மாதமளவில், கந்தளாய் சீனி தொழிற்சாலைக்கு சொந்தமான இரும்புகளை இந்திய நிறுவனம் ஒன்றிற்கு வழங்குவது தொடர்பாக 54 கோடியை இலஞ்சமாக பெறுவதற்கு முயன்றுள்ளனர்.
அதற்கான முற்பணமாக 20 மில்லியன் ரூபாய் பணத்தை, கொழும்பிலுள்ள சொகுசு ஹோட்டல் ஒன்றில் வாகன தரிப்பிடத்தில் வைத்து கைமாற்றிய போது, இலஞ்ச ஊழல் திணைக்கள அதிகாரிகளால் அவர்கள் கைது செய்யப்பட்டனர்.
