சீனாவின் கொவிட் அலையின் உச்சம் இரண்டு முதல் மூன்று மாதங்கள் நீடிக்கும் என்று எதிர்பார்க்கப்படுகிறது என்று சீன நோய் கட்டுப்பாட்டு மையத்தின் முன்னாள் தலைவர் ஸெங் குவாங் தெரிவித்துள்ளார்.
அதேவேளை, சுகாதார வசதி குறைவாக இருக்கும் கிராமப்புற சீனாவில் கொவிட் தொற்றுகள் அதிகரிக்கும் என்று சீன உயர்மட்ட தொற்றுநோயியல் நிபுணர் எச்சரித்துள்ளார்.
இதன்போது அவர் கூறுகையில், ‘கிராமப்புறங்களில் கவனம் செலுத்த வேண்டிய நேரம் இது. கிராமப்புறங்களில் பல முதியவர்கள், நோய்வாய்ப்பட்டவர்கள் மற்றும் ஊனமுற்றோர் ஏற்கனவே கோவிட் சிகிச்சையின் அடிப்படையில் பின்தங்கியுள்ளனர்’ என கூறினார்.
ஸீரோ கொவிட் கொள்கையை கைவிட்டதிலிருந்து தினசரி கொவிட் புள்ளிவிபரங்களை வழங்குவதை சீனா நிறுத்தியுள்ளது.
சீனாவின் மத்திய ஹெனான் மாகாணம் மட்டுமே நோய்த்தொற்று வீதங்களின் விபரங்களை வழங்கிய ஒரே மாகாணமாகும். இந்த மாத தொடக்கத்தில் அங்குள்ள சுகாதார அதிகாரி ஒருவர் கிட்டத்தட்ட 90 சதவீத மக்கள்தொகைக்கு கொவிட் இருப்பதாகக் கூறினார், நகர்ப்புற மற்றும் கிராமப்புறங்களில் இதே போன்ற வீதங்கள் காணப்படுகின்றன.
எவ்வாறாயினும், பல மாகாணங்கள் மற்றும் நகரங்கள் தொற்றுநோய்களின் உச்சத்தை கடந்துள்ளதாக அரசாங்க அதிகாரிகள் கூறுகின்றனர்.
சீனாவில் சந்திர புத்தாண்டு விடுமுறைகள், அதிகாரப்பூர்வமாக ஜனவரி 21 முதல் தொடங்கும், இது உலகின் மிகப்பெரிய வருடாந்திர மக்கள் குடியேற்றத்தை உள்ளடக்கியது.
மொத்தத்தில் சுமார் இரண்டு பில்லியன் பயணங்கள் மேற்கொள்ளப்படும் என எதிர்பார்க்கப்படுகிறது மற்றும் பல்லாயிரக்கணக்கான மக்கள் ஏற்கனவே பயணம் செய்துள்ளனர்.
