பிளாஸ்டிக் சத்திர சிகிச்சையால் ஏற்பட்ட சிறுநீர் பாதிப்புக் காரணமாக ஆஜெண்டினாவைச் சேர்ந்த பிரபல நடிகையான சில்வினா லூனா உயிரிழந்துள்ளமை அந்நாட்டு மக்களிடையே பெரும் சோகத்தை ஏற்படுத்தியுள்ளது.
43 வயதான லூனா கடந்த 2011-ம் ஆண்டு பிளாஸ்டிக் சத்திர சிகிச்சையை மேற்கொண்டிருந்த நிலையில் அவருக்கு சிறுநீரக பாதிப்பு ஏற்பட்டுள்ளது. இதனால் அவர் வாரத்திற்கு சுமார் மூன்று முறைகள் டயாலிசிஸ் சிகிச்சை மேற்கொள்ள வேண்டிய நிலைக்கு தள்ளப்பட்டார்.
இதனிடையே சில்வினாவின் உடல்நிலை தொடர்ந்து மோசமடைந்து வந்ததால், மருத்துவமனையில் அனுமதிக்கப்பட்டு உயிர்காக்கும் கருவிகள் மூலம் சிகிச்சை பெற்று வந்தார்.இந்நிலையில் கடந்த 31 ஆம் திகதி சிகிச்சை பலனின்றி அவர் உயிரிழந்துள்ளார்.
இதேவேளை பிளாஸ்டிக் சத்திர சிகிச்சையால் ஏற்பட்ட பக்க விளைவுகள் காரணமாகவே அவருக்கு உடல்நல பாதிப்புகள் ஏற்பட்டதாக குற்றம் சாட்டப்பட்ட நிலையில், அவருக்கு அறுவை சிகிச்சை செய்த அனிபால் லாடாக்கி என்ற நபர் கைது செய்யப்பட்டுள்ளார் என்பதும் குறிப்பிடத்தக்கது.
கடந்த சில வருடங்களாக பிளாஸ்டிக் சத்திர சிகிச்சை மேற்கொள்ளும் பிரபலங்கள் உயிரிழந்து வருகின்றனர். குறிப்பாக கடந்த ஏப்ரல் மாதம் பிரபல அமெரிக்க மொடல் அழகியான கிறிஸ்டினா ஆஷ்டனும், கடந்த மே மாதம், பிரபல கன்னட நடிகை சேத்தனா ராஜுவும் , பிளாஸ்டிக் சத்திர சிகிச்சை மேற்கொண்ட பின்னர் உடல்நலம் பாதிக்கப்பட்டு உயிரிழந்தனர் என்பது குறிப்பிடத்தக்கது.
