இலங்கை கடற்பரப்புக்குள் அத்துமீறி நுழைந்து, மீன் பிடி நடவடிக்கையில் ஈடுபட்ட 28 இந்திய மீனவர்கள் கைது செய்யப்பட்டுள்ளனர்.
இந்நிலையில் குறித்த மீனவர்களை உடனடியாக விடுவிக்குமாறு வலியுறுத்தி, எதிர்வரும் 18 ஆம் திகதி போராட்டத்தில் ஈடுபடவுள்ளதாக இராமேஸ்வரம் மீனவர்கள் தெரிவித்துள்ளனர்.
நெடுந்தீவு கடற்பரப்பில் அத்துமீறி நுழைந்து மீன் பிடியில் ஈடுபட்ட குற்றச்சாட்டில் 13 இந்திய மீனவர்கள் நேற்று முன்தினம் கடற்படையினரால் கைது செய்யப்பட்டனர்.
இதன் போது கடற்தொழிலாளர்களின் 3 படகுகளும் கடற்படையினரால் கைப்பற்றப்பட்டது.
கைது செய்யப்பட்ட மீனவர்கள், மயிலிட்டி துறைமுகத்திற்கு அழைத்து வரப்பட்டு, ஊர்காவற்துறை நீதவான் நீதிமன்றில் நேற்று முன்னிலைப்படுத்தப்பட்டனர்.
இதன்போது இவர்கள் அனைவரையும் எதிர்வரும் 2 ஆம் திகதிவரை விளக்கமறியலில் வைக்குமாறு நீதவான் உத்தரவிட்டார்.
இந்த நிலையில், தலைமன்னார் கடற்பரப்பில் நேற்று 15 இந்திய மீனவர்களும் கைது செய்யப்பட்டிருந்தனர்.
இராமநாதபுரம் மாவட்டம் தங்கச்சிமடம் பகுதியை சேர்ந்த குறித்த மீனவர்கள், 2 டோலர் படகுகளில் எல்லை தாண்டி இலங்கை கடற்பரப்பில் நுழைந்து மீன் பிடியில் ஈடுபட்டிருந்தபோதே கைது செய்யப்பட்டனர்.
இவர்கள் அனைவரும் இன்று மன்னார் நீதவான் நீதிமன்றில் முன்னிலைப்படுத்தப்படவுள்ள நிலையில், கைது செய்யப்பட்டுள்ள 28 மீனவர்களையும் உடனடியாக விடுவிக்க வேண்டும் என வலியுறுத்தி, எதிர்வரும் 18 ஆம் திகதி பாம்பன் பாலத்தை முற்றுகையிட்டு போராட்டத்தில் ஈடுபடவுள்ளதாக இராமேஸ்வரம் மீனவர்கள் தெரிவித்துள்ளனர்.
மேலும், இந்த கோரிக்கையை முன்வைத்து இன்று முதல் காலவரையற்ற வேலை நிறுத்த போராட்டத்திலும் குறித்த மீனவர்கள் ஈடுபட்டுள்ளனர்.
