இத்தாலியில், வெனிஸ் நகரை சுற்றிப்பார்க்க வரும் வெளிநாட்டினருக்கு ஒருநாள் கட்டணமாக 5 யூரோவை வசூலிக்கவுள்ளதாக, நகர நிர்வாகம் தெரிவித்துள்ளது.
இந்த புதிய நடைமுறை சுற்றுலா ஆர்வலர்களிடம் கவலையை ஏற்படுத்தியுள்ளது.
14 வயதுக்கு உட்பட்ட குழந்தைகள், நகரவாசிகள், ஆராய்ச்சி மாணவர்களுக்கு விலக்கு அளிக்கப்பட்டுள்ளது.
மேலும், சீசன் நாட்களில் கட்டணத்தை அதிகரிக்கும் எண்ணமும் உள்ளதாக நகர நிர்வாகம் குறிப்பிட்டுள்ளது.
இத்தாலியில், ஏரிகளால் சூழ்ந்த பிரபல சுற்றுலா நகரமான வெனிஸ், அதன் இயற்கையான அமைப்புக்கும், கலை கட்டுமானத்திற்கும் பெயர் போனதாக விளங்குகிறது.
பல்வேறு கால்வாய்களை உள்ளடக்கிய இந்த நகரில் படகு போக்குவரத்து சேவையே முக்கிய போக்குவரத்து அம்சமாக உள்ளது.
எழில் கொஞ்சும் வெனிஸ் நகரை படகுகளில் அமர்ந்து சவாரி செய்தவாறு இரசிப்பதற்காகவே வெளிநாடுகளிலிருந்து பலர் வருகைத் தருகின்றனர்.
இந்நிலையிலேயே சுற்றுலா பயணிகளின் வருகையை கட்டுப்படுத்த நகர நிர்வாகம் இவ்வாறானதொரு கட்டண நடைமுறையை அமல்படுத்தியுள்ளமை குறிப்பிடத்தக்கது.
