யாழ்ப்பாணம், சாவகச்சேரிப் பொலிஸ் பிரிவுக்குட்பட்ட ஐயா கடைச் சந்திப் பகுதியில் இடம்பெற்ற விபத்தில் இரு இளைஞர்கள் படுகாயமடைந்துள்ளனர்.
சாவகச்சேரிப் பகுதியில் இருந்து ஏ9 வீதியூடாகச் சென்ற முச்சக்கரவண்டி ஐயா கடைச் சந்திப் பகுதியில் கிளை வீதி ஒன்றிற்குள் திருப்ப முற்பட்ட வேளையிலேயே இந்த விபத்து நேர்ந்துள்ளது.
இதன்போது அதே திசையில் பின்புறமாக வேகமாக வந்த மோட்டார்சைக்கிள் குறித்த முச்சக்கரவண்டியுடன் மோதியுள்ளது.
விபத்தில் மோட்டார்சைக்கிளில் பயணித்த இரு இளைஞர்களும் படுகாயமடைந்த நிலையில் அப்பகுதி வர்த்தகர்களால் மீட்கப்பட்டு சாவகச்சேரி ஆதார வைத்தியசாலையில் சேர்க்கப்பட்டுள்ளனர்.
அதில் ஒருவர் மேலதிக சிகிச்சைக்காக யாழ் போதனா வைத்தியசாலைக்கு அனுப்பி வைக்கப்பட்டுள்ளார் என்று தெரிவிக்கப்பட்டுள்ளது.
விபத்துத் தொடர்பான மேலதிக விசாரணைகளை சாவகச்சேரிப் பொலிஸார் முன்னெடுத்து வருகின்றனர் என்பது குறிப்பிடத்தக்கது.
