நீதிமன்றத்தை அவமதித்த குற்றச்சாட்டில் தற்போது விளக்கமறியலில் வைக்கப்பட்டுள்ள குடிவரவு மற்றும் குடியகல்வு கட்டுப்பாட்டாளர் நாயகம் ஹர்ஷ இல்லுக்பிட்டிய சார்பில் தாக்கல் செய்யப்பட்ட பிணை விண்ணப்பத்தை உயர் நீதிமன்றம் காலவரையறையின்றி ஒத்திவைத்துள்ளது.
நீதிபதி பிரீத்தி பத்மன் சூரசேன தலைமையிலான மூவரடங்கிய உயர் நீதிமன்ற நீதியரசர் குழாம் இலுக்பிட்டியின் சட்டப் பிரதிநிதிகளால் முன்வைக்கப்பட்ட பிணை மனு தொடர்பான உண்மைகளை பரிசீலித்ததன் பின்னர் இந்த உத்தரவை பிறப்பித்துள்ளது.
அதேநேரம், அவர் மீதான நீதிமன்ற அவமதிப்பு வழக்கு மே 8 ஆம் திகதி விசாரணைக்கு ஒத்திவைக்கப்பட்டது.
நீதிமன்றத்தை அவமதித்த குற்றச்சாட்டில் தற்போது விளக்கமறியலில் வைக்கப்பட்டுள்ள இலுக்பிட்டிய, தனது சட்டத்தரணிகள் ஊடாக பிணை விண்ணப்பத்தை சமர்ப்பித்திருந்தார்.
கடந்த அரசாங்கத்தின் போது அறிமுகப்படுத்தப்பட்ட இலத்திரனியல் வீசா வழங்கும் முறைமைக்கு எதிரான அடிப்படை உரிமைகள் மனுக்கள் தொடர்பாக உயர் நீதிமன்றத்தினால் பிறப்பிக்கப்பட்ட இடைக்காலத் தடை உத்தரவை நடைமுறைப்படுத்தத் தவறியமைக்காக குடிவரவு மற்றும் குடியகல்வு கட்டுப்பாட்டாளர் நீதிமன்றத்தை அவமதித்ததாக குற்றம் சாட்டப்பட்டுள்ளார்.
