இலங்கை ஆடை ஏற்றுமதிகள் 2026 ஜனவரி 1 முதல் ஐக்கிய இராச்சியத்திற்கு முழு வரியில்லா அணுகலைப் பெறும் என்று கொழும்பில் உள்ள பிரித்தானிய உயர் ஸ்தானிகராலயம் வியாழக்கிழமை (08) அறிவித்தது.
இங்கிலாந்தின் வளரும் நாடுகளின் வர்த்தகத் திட்டத் (DCTS) சீர்திருத்தங்களின் ஒரு பகுதியாக இந்த அறிவிப்பு வந்துள்ளது.
புதிய விதிகளின் கீழ், இலங்கை ஆடை உற்பத்தியாளர்கள் உலகில் எங்கிருந்தும் 100 சதவீத மூலப்பொருட்களைப் பெறலாம், அதே நேரத்தில் இங்கிலாந்து சந்தைக்கு பூஜ்ஜிய வரி இல்லாத அணுகலை தொடர்ந்து அனுபவிக்கலாம்.
இந்த மாற்றங்கள் இலங்கையின் ஆடை ஏற்றுமதியை கணிசமாக அதிகரிக்கும் என்று எதிர்பார்க்கப்படுகிறது.
இலங்கை தற்போது பிரித்தானியாவின் இரண்டாவது பெரிய ஆடை ஏற்றுமதி இடமாக உள்ளது.
இலங்கை அங்கு ஆண்டுதோறும் சுமார் 675 மில்லியன் அமெரிக்க டொலர் பெறுதியான ஏற்றுமதிகளைக் கொண்டுள்ளது.
இந்த சீர்திருத்தங்கள், 65 வளரும் நாடுகளுக்கு முன்னுரிமை சந்தை அணுகலை வழங்கும் ஐக்கிய இராஜ்ஜியத்தின் வளரும் நாடுகளின் வர்த்தகத் திட்டத்தில் பரந்த மாற்றங்களின் ஒரு பகுதியாகும் என்று பிரித்தானிய உயர் ஸ்தானிகராலயம் வெளியிட்டுள்ள அறிக்கையில் சுட்டிக்காட்டப்பட்டுள்ளது.
வர்த்தக கூட்டாண்மைகளை வலுப்படுத்துவதற்கும் இலங்கையின் பொருளாதார வளர்ச்சியை ஆதரிப்பதற்கும் இங்கிலாந்தின் உறுதிப்பாட்டை இந்த சீர்திருத்தங்கள் பிரதிபலிக்கின்றன என்று இலங்கைக்கான பிரித்தானிய உயர் ஸ்தானிகர் ஆண்ட்ரூ பேட்ரிக் அந்த அறிக்கையில் கூறியுள்ளார்.
மூலப்பொருட்களின் விதிகளை எளிமைப்படுத்துவதன் மூலம், இலங்கை ஏற்றுமதியாளர்களுக்கான சந்தை அணுகலை இங்கிலாந்து மேம்படுத்துவதுடன், ஏற்றுமதிகளை பல்வகைப்படுத்துவதற்கான முயற்சிகளை ஆதரிக்கிறது என்றும் அவர் கூறினார்.
அதே நேரத்தில் உற்பத்தியாளர்கள் திட்டத்தின் கீழ் வழங்கப்படும் நன்மைகளை முழுமையாகப் பயன்படுத்துமாறும் வலியுறுத்தினார்.
இந்த நிலையில், சீர்திருத்தங்களை வரவேற்றுள்ள இலங்கையின் கூட்டு ஆடை சங்க மன்றத்தின் பொதுச் செயலாளர் யோகன் லோரன்ஸ், இந்த மாற்றங்கள் மூலப்பொருட்களை வாங்குவதில் நீண்டகாலமாக நிலவும் கட்டுப்பாடுகளை நீக்கி, இலங்கை உற்பத்தியாளர்கள் உலகளாவிய விநியோகச் சங்கிலிகளில் மிகவும் திறம்பட போட்டியிட அனுமதிக்கின்றன என்றார்.
இலங்கையின் இங்கிலாந்துக்கான ஏற்றுமதியில் 60 சதவீதத்திற்கும் அதிகமான பங்கை ஆடைத் துறை கொண்டுள்ளது என்றும், இவை சுமார் ஒரு மில்லியன் வாழ்வாதாரங்களை ஆதரிப்பதாகவும், சீர்திருத்தங்கள் ஏற்றுமதி வளர்ச்சிக்கு குறிப்பிடத்தக்க ஊக்கமளிப்பதாகவும் அவர் குறிப்பிட்டார்.
இதற்கிடையில் இந்த சீர்திருத்தங்கள் இங்கிலாந்து-இலங்கை வர்த்தக உறவுகளை வலுப்படுத்தும் என்றும், ஆடைத் துறைக்கு அப்பால் நன்மைகள் கிடைக்கும் என்று பிரித்தானியாவுடனான வணிக கவுன்சிலின் தலைவர் மார்க் சர்கெனர் கூறினார்.
90 சதவீதத்திற்கும் அதிகமான பொருட்கள் இப்போது இங்கிலாந்தின் வளரும் நாடுகளின் வர்த்தகத் திட்டத்தின் கீழ் பூஜ்ஜிய வரிகளுக்கு தகுதியுடையவை, இது மற்ற தொழில்களில் ஏற்றுமதியாளர்களுக்கு புதிய வாய்ப்புகளை உருவாக்குகிறது என்றும் அவர் குறிப்பிட்டார்.
இலங்கை அரசாங்கம் மற்றும் கூட்டு ஆடை சங்க மன்றம் உள்ளிட்ட வணிகங்கள் மற்றும் பங்காளர் நாடுகளின் கோரிக்கைகளைத் தொடர்ந்து இந்த சீர்திருத்தங்கள் அறிமுகப்படுத்தப்பட்டன.
மேலும் வரும் ஆண்டுகளில் இங்கிலாந்தின் வளரும் நாடுகளின் வர்த்தகத் திட்டத்தின் பயன்பாட்டை அதிகரிக்க வழிவகுக்கும் என்று எதிர்பார்க்கப்படுகிறது.
