அகமதாபாத்தில் இன்று (11) நடைபெற்ற பரபரப்பான 2026 ஐசிசி ஆடவர் டி20 உலகக் கிண்ணத்தின் குழு டி போட்டியில் இரண்டு வியத்தகு சூப்பர் ஓவர்களுக்குப் பின்னர் தென்னாப்பிரிக்கா ஆப்கானிஸ்தானை வீழ்த்தி த்ரில் வெற்றியைப் பெற்றது.
அகமதாபாத், நரேந்திர மோடி மைதானத்தில் இன்று காலை 11.00 மணிக்கு ஆரம்பமான தொடரின் 13 ஆவது போட்டியில் ஆப்கானிஸ்தான் நாணய சுழற்சியில் வெற்றி பெற்று பந்து வீசத் தீர்மானித்து.
அதன்படி, முதலில் துடுப்பெடுத்தாடிய தென்னாப்பிரிக்கா ரியான் ரிக்கல்டன் (28 பந்துகளில் 61 ஓட்டம்) மற்றும் குயின்டன் டி கொக் (41 பந்துகளில் 59 ஓட்டங்கள்) ஆகியோரின் அரை சதங்களால் 20 ஓவர்களில் 187/6 ஓட்டங்களை எடுத்தது.
பின்னர் வலுவானா ஓட்ட இலக்கினை துரத்திய ஆப்கானிஸ்தானுக்கு ஆரம்ப துடுப்பாட்ட வீரர் ரஹ்மானுல்லா குர்பாஸ் நல்லதொரு பங்களிப்பினை (42 பந்துகளில் 84 ஓட்டங்கள்) வழங்கினார்.
எனினும், கடைசி ஓவரில் ககிசோ ரபாடாவின் இரண்டு நோ-போல்களுடன் ஆப்கானிஸ்தான் 19.5 ஓவர்களில் 187 ஓட்டங்களுக்குள் சகல விக்கெட்டுகளையும் இழந்தது.
இதனால் ஆட்டம் சூப்பர் ஓவருக்கு சென்றது.
வழக்கமான போட்டியில் மூன்று விக்கெட்டுகளை வீழ்த்திய தென்னாப்பிரிக்கா அணியின் லுங்கி நிகிடி சூப்பர் ஓவருக்காக பந்துப் பரிமாற்றம் மேற்கொண்டார்.
ஆப்கானிஸ்தானின் அஸ்மதுல்லா ஒமர்சாய் இரண்டு சிக்ஸர்கள் மற்றும் ஒரு பவுண்டரியை விளாச அணி 17 ஓட்டங்களை பெற்றுக் கொண்டது.
18 என்ற வெற்றி இலக்கினை சேஸிங் செய்த தென்னாப்பிரக்க அணியும் சூப்பர் ஓவரில் 17 ஓட்டங்களை எடுத்தது.
இதனால் ஆட்டம் இரண்டாவது சூப்பர் ஓவருக்கு சென்றது.
பின்னர் ஸ்டப்ஸ் மற்றும் டேவிட் மில்லர் ஆகியோர் உமர்சாயின் பந்து வீச்சுக்கு எதிராக மொத்தம் மூன்று சிக்ஸர்களை அடித்து இரண்டாவது சூப்பர் ஓவரில் 24 ஓட்டங்களை எடுத்தனர்.
தொடர்ந்து 25 ஓட்டங்கள் வெற்றி என்ற இலக்கினை நோக்கி களமிறங்கிய ஆப்கானிஸ்தான் அணிக்கு மொஹமட் நபி ஏமாற்றம் அளித்தார்.
ஆரம்ப துடுப்பாட்ட வீரராக களமிறங்கிய அவர் முதல் பந்தினை தவறவிட்டும், இரண்டாவது பந்தில் ஆட்டமிழந்தும் வெளியேறினார்.
இதனால் அடுத்து வந்த குர்பாஸுக்கு கடைசி நான்கு பந்துகளில் நான்கு சிக்ஸர்களை அடிக்க வேண்டியிருந்தது.
துணிவுடன் கேசவ் மகாராஜின் பந்து வீச்சினை எதிர்கொண்ட அவர் தொடர்ச்சியாக மூன்று சிக்ஸர்களை விளாசினார்.
ஆனால் இறுதி பந்தில் ஆட்டமிழந்து வெளியேறினார்.
இதன் விளைவாக ஆப்கானிஸ்தான் இரண்டாவது சூப்பர் ஓவரில் தோல்வியை தழுவியது.
அதேநேரம், ஆப்கானிஸ்தான் இப்போது தாங்கள் எதிர்கொண்ட முதலிரு குழு நிலைப் போட்டிகளிலும் தோல்வியைத் தழுவியுள்ளனர்.
அதே நேரத்தில் நியூசிலாந்து மற்றும் தென்னாப்பிரிக்கா ஆகிய அணிகள் இரண்டு போட்டிகளில் இரண்டு வெற்றிகளைப் பெற்றுள்ளது.
