பாலியல் குற்றச்சாட்டில் சிறையிலிருந்த நடிகர் ஜான் ஆல்ஃபோர்ட் மரணம் – விசாரணைகள் தீவிரம்!

முன்னாள் பிரபல பிரித்தானிய நடிகரான ஜான் ஆல்ஃபோர்ட் (John Alford), சிறையில் அடைக்கப்பட்ட இரண்டு மாதங்களில் மர்மமான முறையில் உயிரிழந்துள்ளார்.

இதுகுறித்து தற்போது பொலிஸார் தீவிர விசரணைகளை ஆரம்பித்துள்ளனர்.

இரண்டு சிறுமிகளைப் பாலியல் துஷ்பிரயோகம் செய்த குற்றத்திற்காக சிறைத்தண்டனை அனுபவித்து வந்த 54 வயதான நடிகர் ஜான் ஆல்ஃபோர்ட் (உண்மையான பெயர் ஜான் ஷானன்), நோர்போக்கில் உள்ள ‘HMP Bure’ சிறையில் கடந்த மார்ச் 13 அன்று சடலமாகக் கண்டெடுக்கப்பட்டார்.

அவரது மரணம் குறித்து சிறைச்சாலை மற்றும் நன்னடத்தை குறைதீர்ப்பாளர் விசாரணை நடத்துவார் என சிறைத்துறை ஊடகப் பேச்சாளர் உறுதிப்படுத்தியுள்ளார்.

கடந்த 2022-ஆம் ஆண்டு, 14 மற்றும் 15 வயதுடைய இரண்டு சிறுமிகளுக்கு மதுபானம் வாங்கிக் கொடுத்து, அவர்களைப் பாலியல் துஷ்பிரயோகம் செய்ததாக ஜான் மீது குற்றம் சுமத்தப்பட்டது.

இந்த வழக்கில் அவர் குற்றவாளி எனத் தீர்ப்பளிக்கப்பட்டு, கடந்த ஜனவரி 14-ஆம் திகதி அவருக்கு எட்டரை ஆண்டுகள் சிறைத்தண்டனை விதிக்கப்பட்டது.

இந்நிலையில் தீர்ப்பின் போது, தனது செயல்களை மறுத்த அவர், “நான் இதைச் செய்யவில்லை” என்று நீதிமன்றத்தில் கூச்சலிட்டது குறிப்பிடத்தக்கது.

இதேவேளை, 1993-இல் ‘லண்டன்ஸ் பர்னிங்’ (London’s Burning) என்ற தொடரில் தீயணைப்பு வீரராக நடித்ததன் மூலம் புகழின் உச்சிக்குச் சென்ற அவர் 1997-இல் மறைமுகப் புலனாய்வு ஊடகவியலாளர் ஒருவருக்கு போதைப்பொருள் விநியோகம் செய்த குற்றத்திற்காக ஒன்பது மாதங்கள் சிறை சென்றதையடுத்து, அவரது கலைப்பயணம் பெரும் வீழ்ச்சியைச் சந்தித்தது.

வழக்கை விசாரித்த நீதிபதி, ஜான் ஆல்ஃபோர்டின் இத்தகைய செயல்கள் அந்தச் சிறுமிகளின் வாழ்க்கையில் பாரிய மற்றும் தொடர்ச்சியான பாதிப்புகளை ஏற்படுத்தியுள்ளதாகத் தனது தீர்ப்பில் சுட்டிக்காட்டியிருந்தார்.

இந்நிலையில், தண்டனை பெற்று இரண்டு மாதங்களிலேயே சிறையில் அவர் உயிரிழந்திருப்பது பரபரப்பை ஏற்படுத்தியுள்ளது.