பார்சிலோனா (Barcelona) கால்பந்து அணியின் முன்னணி நட்சத்திர அதிரடி ஆட்டக்காரரான ரொபர்ட் லெவாண்டோவ்ஸ்கி (Robert Lewandowski), இந்த கோடைகாலத்துடன் தனது ஒப்பந்தம் நிறைவடைவதை அடுத்து, அணியில் இருந்து விலகப் போவதாக (நேற்று) உத்தியோகபூர்வமாக அறிவித்துள்ளார்.
போலந்து நாட்டைச் சேர்ந்த 37 வயதான இந்த மூத்த வீரர், தனது இன்ஸ்டாகிராம் (Instagram) பக்கத்தில் இது குறித்து உருக்கமான பதிவை வெளியிட்டுள்ளார்.
கடந்த 2022 ஆம் ஆண்டு பேயர்ன் முனிச் (Bayern Munich) அணியில் இருந்து பார்சிலோனாவில் இணைந்த லெவாண்டோவ்ஸ்கி, அணியில் விளையாடிய 191 போட்டிகளில் மொத்தம் 119 கோல்களை அடித்து அசத்தியுள்ளார்.
பார்சிலோனா நிதி நெருக்கடியிலும் சரிவிலும் இருந்த காலகட்டத்தில் அணியில் இணைந்து, அதனை மீண்டும் ஸ்பானிய கால்பந்தின் அரியணையில் ஏற்ற உதவினார்.
அவரது பங்களிப்புடன் பார்சிலோனா அணி இந்த நடப்பு சீசன் உட்பட மூன்று முறை ‘லா லிகா’ (La Liga) பட்டங்களையும், 2025 இல் கோபா டெல் ரே (Copa del Rey) கோப்பையையும் வென்று சாதனை படைத்தது.
அத்துடன், தனது அறிமுக சீசனிலேயே லா லிகா தொடரின் அதிக கோல்களை அடித்த வீரராகவும் அவர் திகழ்ந்தார்.
இதேவேளை, இன்று (17) ரியல் பெட்டிஸ் (Real Betis) அணிக்கு எதிராக காம்ப் நௌ (Camp Nou) மைதானத்தில் நடைபெறும் போட்டியே லெவாண்டோவ்ஸ்கி பார்சிலோனா சீருடையில் விளையாடும் கடைசிப் போட்டியாகும். அவர் இப்போட்டியில் ஆரம்ப வீரராகக் களம் இறங்குவார் என்பதை அணியின் தலைமைப் பயிற்சியாளர் ஹான்சி ஃபிளிக் (Hansi Flick) உறுதிப்படுத்தியுள்ளார்.
லெவாண்டோவ்ஸ்கி குறித்துப் பேசிய பயிற்சியாளர் ஃபிளிக், “அவர் ஒரு உலகத்தரம் வாய்ந்த வீரர் மட்டுமல்ல, சிறந்த மனிதரும் கூட. நான் அவருடன் பல வருடங்களாகப் பணியாற்றியுள்ளேன். நான் வென்ற 9 கோப்பைகளும் அவருடன் இணைந்து வென்றவைதான். இளம் வீரர்களுக்கு அவர் ஒரு சிறந்த முன்மாதிரி. அவர் ஒரு நட்சத்திரமாக வந்து, இன்று ஒரு ஜாம்பவானாக (Legend) விடைபெறுகிறார்” என்று புகழாரம் சூட்டியுள்ளார்.
நடப்பு சீசனில் 44 போட்டிகளில் விளையாடி 18 கோல்களை அடித்துள்ள லெவாண்டோவ்ஸ்கி, தனது அடுத்தகட்ட பயணம் குறித்து இன்னும் இறுதி முடிவு எதையும் அறிவிக்கவில்லை. எனினும், அவர் சவூதி அரேபியா அல்லது அமெரிக்காவின் (USA) முன்னணி கிளப் ஒன்றில் இணையலாம் என விளையாட்டு வட்டாரங்கள் தெரிவிக்கின்றன.
