கட்டுநாயக்க நெடுஞ்சாலையில் மின்னணு சுங்க வசூல் பயனர்களுக்கு 10% கட்டணம் தள்ளுபடி!

கொழும்பு–கட்டுநாயக்க அதிவேக நெடுஞ்சாலையில் மின்னணு சுங்க வசூல் (ETC) முறையின் பயன்பாட்டை மேலும் ஊக்குவிக்கும் நடவடிக்கைகளை போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சு அறிமுகப்படுத்தியுள்ளது.

மேம்படுத்தப்பட்ட ETC வசதிகள் குறித்த விழிப்புணர்வு நிகழ்ச்சிகள் இன்று (15) நடத்தப்பட்டன. 

இது தொடர்பான அமைச்சின் தகவலின்படி,

வாகன ஓட்டிகள் இப்போது ரொக்கம், அட்டைகள் அல்லது ETC அமைப்பைப் பயன்படுத்தி சுங்கக் கட்டணம் செலுத்தலாம். 

மேலும், தாமதங்களைக் குறைக்கவும், போக்குவரத்து ஓட்டத்தை மேம்படுத்தவும் ETC பயனர்களுக்காக பிரத்யேக நுழைவு மற்றும் வெளியேறும் பாதைகள் அமைக்கப்பட்டுள்ளன.

ETC பயனர்கள் இந்தத் திட்டத்தின் மூலம் மேற்கொள்ளும் ஒவ்வொரு பயணத்திற்கும் சுங்கக் கட்டணத்தில் 10 சதவீத தள்ளுபடி பெற உரிமை உண்டு.

தற்பொழுது, பெலியகொட, கெரவலப்பிட்டிய, ஜா-எல மற்றும் கட்டுநாயக்க பரிமாற்றுச் சாவடிகளில் ETC கட்டணங்களைச் செலுத்தலாம். 

வெளிவட்டப் பெருஞ்சாலை வழியாக கொழும்பு–கட்டுநாயக்க அதிவேக நெடுஞ்சாலையை அணுகும் வாகனங்களுக்காக கடவத்த பரிமாற்றுச் சாவடியிலும் இந்த வசதியை அறிமுகப்படுத்தும் திட்டங்கள் செயல்படுத்தப்பட்டு வருகின்றன.

ETC சேவைக்குப் பதிவு செய்யும்போது வாகன உரிமையாளர்கள் முன்பு பல சிரமங்களை எதிர்கொண்டதாகவும், அடிக்கடி பல இடங்களுக்குச் செல்ல வேண்டியிருந்ததாகவும் அதிகாரிகள் குறிப்பிட்டனர். 

இதற்குப் பதிலளிக்கும் விதமாக அமைச்சும், வீதி அபிவிருத்தி அதிகார சபையும் (RDA) www.exway.rda.gov.lk இணையதளம் மூலம் இணையவழிப் பதிவைச் சாத்தியமாக்கியுள்ளன. 

இது வாகன சாரதிகளுக்கு மிகவும் வசதியாகப் பதிவு செய்துகொள்ள வழிவகுக்கிறது.

பதிவுசெய்த பிறகு, பயனர்கள் குறிப்பிட்ட பரிமாற்ற மையத்திலிருந்து RFID டேக்கைப் பெற்று, வங்கி அட்டையைப் பயன்படுத்தி இணையதளம் அல்லது GovPay மூலம் தங்கள் ETC கணக்கில் பணத்தை நிரப்பலாம். 

இது செயல்படுத்தப்பட்டவுடன், சுங்கக் கட்டணங்கள் தானாகவே கழிக்கப்படும்.

இதன்மூலம் விரைவுச்சாலை சுங்க வாயில்கள் வழியாகத் தடையற்ற பயணத்தை மேற்கொள்ள முடியும் – என்று கூறியுள்ளது.

இதேவேளை, அமைப்பின் தடையற்ற செயல்பாட்டை உறுதி செய்வதற்காக, ETC பாதைகளைப் பயன்படுத்தும் வாகன சாரதிகள், நுழைவு மற்றும் வெளியேறும் இடங்களில் மணிக்கு 15 கிலோமீட்டர் வேகத்தைப் பராமரிக்கவும், முன்னால் செல்லும் வாகனத்திலிருந்து குறைந்தபட்சம் 20 மீட்டர் இடைவெளியைக் கடைப்பிடிக்கவும் RDA அறிவுறுத்தியுள்ளது.