உயிர்த்த ஞாயிறு பயங்கரவாதத் தாக்குதல்கள் தொடர்பான விசாரணைகள் குறித்து தன்னைக் கைது செய்வதைத் தடுக்கும் ஆணை கோரி முன்னாள் ஜனாதிபதி கோட்டாபய ராஜபக்ஷ தாக்கல் செய்த மனு, இன்று (17) மேல்முறையீட்டு நீதிமன்றத்தில் விசாரணைக்கு எடுத்துக்கொள்ளப்பட்டது.
மேல்முறையீட்டு நீதிமன்றத் தலைவர் நீதிபதி ரோகந்த அபேசூரிய மற்றும் நீதிபதி பிரியந்த பெர்னாண்டோ ஆகியோர் அடங்கிய மேல்முறையீட்டு நீதிமன்ற அமர்வின் முன்பாக இந்த மனு விசாரிக்கப்பட்டது.
விசாரணையின் போது, நீதிபதி பிரியந்தா பெர்னாண்டோ தனிப்பட்ட காரணங்களால் இந்த வழக்கில் பங்கேற்கப் போவதில்லை என்று தெரிவித்தார்.
மனு தொடர்பாக பிரதிவாதிகளிடமிருந்து இதுவரை எந்த அறிவுறுத்தல்களும் பெறப்படவில்லை என சட்டமா அதிபர் நீதிமன்றத்தில் தெரிவித்தார்.
கோட்டாபய ராஜபக்ஷ சார்பில் முன்னிலையான ஜனாதிபதி சட்டத்தரணி ரொமேஷ் டி சில்வா, தனது கட்சிக்காரரின் கைது நடவடிக்கையைத் தடுக்கும் இடைக்கால உத்தரவைப் பிறப்பிக்குமாறு நீதிமன்றத்தைக் கேட்டுக்கொண்டார்.
இருப்பினும், எதிர்மனுதாரர்கள் சார்பில் முன்னியான துணை சொலிசிட்டர் ஜெனரல் சுஹர்ஷி ஹெரத், தமக்கு சம்பந்தப்பட்ட ஆவணங்கள் இன்று காலைதான் கிடைத்ததாகவும், எதிர்மனுதாரர்களிடமிருந்து இன்னும் அறிவுறுத்தல்களைப் பெறவில்லை என்றும் நீதிமன்றத்தில் தெரிவித்தார்.
எதிர்மனுதாரர்களின் அறிவுறுத்தல்கள் இல்லாமல் மனுதாரர் கைது செய்யப்பட மாட்டார் என்று தன்னால் உறுதியளிக்க இயலவில்லை என்றும் அவர் மேலும் கூறினார்.
அதனைத் தொடர்ந்து, மேல்முறையீட்டு நீதிமன்றம் இந்த வழக்கை மேலதிக பரிசீலனைக்காக நண்பகல் வரை ஒத்திவைத்தது.
