2026 ஆம் ஆண்டின் முதல் பாதியில் இலங்கையின் ஏற்றுமதித் துறை குறிப்பிடத்தக்க வளர்ச்சியைப் பதிவு செய்துள்ளது.
இதில் மொத்த ஏற்றுமதி வருவாய் 9 பில்லியன் அமெரிக்க டொலர் என்ற அளவைத் தாண்டியுள்ளது.
இலங்கை ஏற்றுமதி அபிவிருத்திச் சபையின் (EDB) தகவல்களின்படி, 2026 ஜனவரி முதல் ஜூன் வரையிலான காலப்பகுதியில் பொருட்கள் மற்றும் சேவைகளின் ஒருங்கிணைந்த ஏற்றுமதி மதிப்பானது சுமார் 9,012.24 மில்லியன் அமெரிக்க டொலர்களை எட்டியுள்ளது.
இதன் மூலம் இலங்கையின் ஏற்றுமதித் துறை தனது உறுதியான தன்மையையும் தொடர்ச்சியான வளர்ச்சியையும் தொடர்ந்து வெளிப்படுத்தியுள்ளது.
2025 ஆம் ஆண்டின் இதே காலப்பகுதியுடன் ஒப்பிடுகையில், இது ஆண்டுக்கு ஆண்டு 8 சதவீத வளர்ச்சியைக் குறிப்பதாக ஏற்றுமதி அபிவிருத்திச் சபை மேலும் தெரிவித்தது.
இதற்கிடையில், சேவை ஏற்றுமதிகள் தொடர்ந்து நேர்மறையான வளர்ச்சிப் பாதையைத் தக்கவைத்துக் கொண்டன.
2026 ஜனவரி முதல் ஜூன் வரையிலான காலப்பகுதியில் இதன் மதிப்பு சுமார் 1,938.94 மில்லியன் அமெரிக்க டொலர்களை எட்டியது.
இது முந்தைய ஆண்டின் இதே காலப்பகுதியுடன் ஒப்பிடுகையில் 4.49 சதவீத வளர்ச்சியாகும்.
சேவை ஏற்றுமதிகளின் இந்தத் தொடர்ச்சியான விரிவாக்கமானது, இலங்கையின் ஒட்டுமொத்த ஏற்றுமதி வருவாய் மற்றும் வெளிநாட்டுத் துறைச் செயல்பாடுகளில் இத்துறையின் வளர்ந்து வரும் பங்களிப்பை மேலும் வலுப்படுத்துவதாக ஏற்றுமதி அபிவிருத்திச் சபை குறிப்பிட்டுள்ளது.
இலங்கை சுங்கத் திணைக்களம் வெளியிட்ட தற்காலிகத் தரவுகள் மற்றும் இரத்தினக் கற்கள், ஆபரணங்கள் மற்றும் பெற்றோலியப் பொருட்கள் ஆகியவற்றின் மதிப்பிடப்பட்ட ஏற்றுமதி மதிப்புகளைக் கருத்தில் கொள்ளும்போது, 2026 ஜூன் மாதத்தில் இலங்கையின் சரக்கு ஏற்றுமதி 1,314.10 மில்லியன் அமெரிக்க டொலர்களாகப் பதிவாகியுள்ளது.
இது 2025 ஜூன் மாதத்துடன் ஒப்பிடுகையில் 15.09% என்ற வலுவான வருடாந்தர வளர்ச்சியைக் குறிக்கிறது.
சேவை ஏற்றுமதித் துறையும் தனது நேர்மறையான வளர்ச்சிப் போக்கைத் தக்கவைத்துக்கொண்டு, 2026 ஜூன் மாதத்தில் சுமார் 344.52 மில்லியன் அமெரிக்க மொலர் மதிப்பிலான வருவாயை ஈட்டியது; இது முந்தைய ஆண்டின் இதே மாதத்துடன் ஒப்பிடுகையில் 3.75 சதவீத வளர்ச்சியைக் குறிக்கிறது.
இதன்படி, பொருட்கள் மற்றும் சேவைகள் ஆகிய இரண்டையும் உள்ளடக்கிய இலங்கையின் மொத்த ஏற்றுமதி, 2025 ஜூன் மாதத்துடன் ஒப்பிடுகையில் 12.53% ஆண்டுக்கு-ஆண்டு வளர்ச்சியைப் பதிவு செய்து, 2026 ஜூன் மாதத்தில் சுமார் 1,658.62 மில்லியன் அமெரிக்க டொலர்களை எட்டியது.
2026-ஆம் ஆண்டின் முதல் பாதியில் இலங்கையின் ஏற்றுமதிச் செயல்பாடு நாட்டின் வெளிநாட்டுத் துறையின் வலிமையை வெளிப்படுத்துவதாகவும், மொத்த ஏற்றுமதி மதிப்பு 9 பில்லியன் அமெரிக்க டொலர்களை தாண்டியுள்ளதாகவும் ஏற்றுமதி மேம்பாட்டுச் சபை குறிப்பிட்டுள்ளது.
பொருட்கள் மற்றும் சேவைகள் ஏற்றுமதியில் எட்டப்பட்ட இந்தத் தொடர்ச்சியான வளர்ச்சியானது, நாட்டின் நீண்டகாலப் பொருளாதார மேம்பாட்டு இலக்குகளுக்கு ஏற்ப, பன்முகத்தன்மை கொண்ட, போட்டித்திறன் மிக்க மற்றும் ஏற்றுமதியை மையமாகக் கொண்ட பொருளாதாரத்தை உருவாக்கும் நோக்கிய முன்னேற்றத்தை பிரதிபலிக்கிறது என்றும் அச்சபை மேலும் தெரிவித்தது.
