இறக்குமதி மற்றும் ஏற்றுமதி நிதி மோசடியாளர்களை ‘குற்றவியல் சட்டத்தின்’ கீழ் கைதுசெய்ய நடவடிக்கை!

இறக்குமதி மற்றும் ஏற்றுமதி பரிவர்த்தனைகளில் நிதி மோசடிகளைத் தடுக்கும் பொருட்டு, இதில் ஈடுபடுவோரைக் குற்றவாளிகளாகப் பிடிப்பதற்கான சட்ட விதிகள் வகுக்கப்பட்டு வருவதாக நிதி மற்றும் திட்டமிடல் பிரதி அமைச்சர் அனில் ஜெயந்த தெரிவித்தார்.

நேற்று (23) நடைபெற்ற நாடாளுமன்ற விவாதத்தில் பங்கேற்ற பிரதி அமைச்சர், தற்போதைய அந்நியச் செலாவணிச் சட்டத்தில் உள்ள குறைபாடுகள் காரணமாக, இதுபோன்ற நிதி மோசடிகள் தற்போது ‘குடிமைக் குற்றங்களாக’ மட்டுமே வகைப்படுத்தப்படுவதாக வலியுறுத்தினார்.

“தற்போதைய சட்டத்தின்படி, இதுபோன்ற மோசடிகளுக்கு மத்திய வங்கியால் அபராதம் மட்டுமே விதிக்கப்படுகிறது.

வேண்டுமென்றே டொலர்களை மோசடி செய்பவர்களுக்கு அபராதம் செலுத்துவது கடினமானதல்ல.

எனவே, தற்போதைய அரசாங்கம் புதிய விதிமுறைகளை அமல்படுத்த நடவடிக்கை எடுத்து வருகிறது,” என்று பிரதி அமைச்சர் அனில் ஜெயந்த கூறினார்.

இந்தப் பிரச்சினையைத் தீர்க்க, தொடர்புடைய சட்டவிரோதச் செயல்களைக் குற்றவியல் குற்றமாக வரையறுக்க அமைச்சரவைக் குறிப்பு ஒன்று சமர்ப்பிக்கப்படும் என்றும் அவர் தெரிவித்தார்.

குற்றப் புலனாய்வுத் துறை (CID) உள்ளிட்ட சட்ட அமலாக்க அமைப்புகளால் நடத்தப்பட்ட மூன்று விசாரணை அறிக்கைகள், பெரிய அளவிலான நிதி மோசடிகளை வெளிப்படுத்தியுள்ளன.

தற்போதைய நடைமுறையின்படி, இறக்குமதியாளர்கள் சுங்க அனுமதி பெறுவதற்கு முன்பாகவே, அதனை எளிதாக்குவதற்காக முன்பணம் செலுத்த அனுமதிக்கப்படுகிறார்கள்.

அதன்படி, தொழில்களில் பயன்படுத்தப்படும் பொதுவான பொருட்களுக்கு 180 நாட்களும், சில குறிப்பிட்ட சிறப்புப் பொருட்களுக்கு 360 நாட்களும், மற்றும் தொழில்துறை உபகரண உற்பத்தி போன்ற நீண்ட காலத் தேவைகளுக்கு 730 நாட்கள் வரையும் சலுகைக் காலம் வழங்கப்படுகிறது.

இருப்பினும், இந்தச் சலுகையைத் தவறாகப் பயன்படுத்தி டொலர்கள் வெளிநாடுகளுக்கு அனுப்பப்பட்டிருந்தாலும், அதற்கு மாறாக நாட்டிற்குள் எந்தப் பொருட்களும் இறக்குமதி செய்யப்படவில்லை என்று விசாரணைகள் வெளிப்படுத்தியுள்ளன.

இந்த நிலையைத் தடுப்பதற்காக அரசாங்கம் பல முக்கிய நடவடிக்கைகளை எடுக்கத் திட்டமிட்டுள்ளதாக அனில் ஜயந்த தெரிவித்தார்.

தற்போதுள்ள சிக்கல்களைத் தீர்ப்பதற்கும், தத்தமது அமைப்புகளை ஒருங்கிணைப்பதற்கும் இலங்கை மத்திய வங்கி, வர்த்தக வங்கிகள், சுங்கத் துறை மற்றும் நிறுவனப் பதிவாளர் அலுவலகம் ஆகியவை செயல்பட்டு வருவதாக அவர் சுட்டிக்காட்டினார்.

நிதிப் பரிவர்த்தனைகளை மேற்கொள்ளும்போது வங்கியாளர்கள் சுங்கத் துறையில் பதிவு செய்ய வேண்டும் என்ற விதிமுறைகளை அமல்படுத்துவதற்கான நடவடிக்கைகள் எடுக்கப்பட்டுள்ளன.

மேலும், பல்வேறு சுங்கக் குறியீடுகளைத் தவறாகப் பயன்படுத்தி சட்டவிரோதமாகப் பொருட்களை ஏற்றுமதி செய்யும் ஒரு மோசடிக் கும்பலும் இருப்பதாக பிரதி அமைச்சர் வெளிப்படுத்தினார்.

நாட்டிலிருந்து ஏற்றுமதி செய்ய முடியாத உலோகங்கள் போன்ற பொருட்கள், அவற்றின் வடிவம் மாற்றப்பட்டு, மற்ற பொருட்கள் என்ற பெயரில் போலிக் குறியீடுகளின் கீழ் ஏற்றுமதி செய்யப்படுவதும் தெரியவந்துள்ளது.

சரியாக வரி செலுத்தி, சட்டப்பூர்வமாக தொழில் செய்பவர்களுக்கு இது ஒரு பெரும் அநீதி என்று சுட்டிக்காட்டிய அனில் ஜெயந்தா, புதிய சட்டங்கள் இதுபோன்ற சட்டவிரோத ஏற்றுமதிகளைத் தடுக்கும் என்றும், உள்ளூர் தொழில்களை மேம்படுத்த அதிகபட்ச நடவடிக்கைகள் எடுக்கப்படும் என்றும் தெரிவித்தார்.