சுற்றுலா, வர்த்தகத்திற்கு ஊக்கம்: கொழும்பு – ஹோ சி மின் நகரை இணைத்த வியட்ஜெட்!

வியட்நாமின் குறைந்த கட்டண விமான நிறுவனமான ‘வியட்ஜெட் ஏர்’ (Vietjet Air), இலங்கைக்கும் வியட்நாமுக்கும் இடையே நேரடி விமான சேவையைத் தொடங்கியுள்ளது.

இதன் முதல் விமானம் நேற்று இரவு (18) கொழும்பு, பண்டாரநாயக்க சர்வதேச விமான நிலையத்தை (BIA) வந்தடைந்தது.

அதன்படி, ஹோ சி மின் நகரிலிருந்து 169 பயணிகளுடன் வந்த வியட்ஜெட்டின் முதல் விமானமான VJ-1875, இரவு 9:33 மணிக்கு கட்டுநாயக்கவை வந்தடைந்தது.

180 சாதாரண பயணிகள் (economy-class) இருக்கைகளைக் கொண்ட ஏர்பஸ் A320 (Airbus A320) ரக விமானம் மூலம் இந்தச் சேவை இயக்கப்படுகிறது. 

இந்த விமான ச‍ேவையானது வியட்நாம் மற்றும் தெற்காசியாவுக்கு இடையே ஒரு புதிய இணைப்பை ஏற்படுத்துவதுடன், இரு நாடுகளுக்கும் இடையிலான பயணம், சுற்றுலா மற்றும் வர்த்தகத்தையும் எளிதாக்கும்.

மூன்றாவது நாடு வழியாகச் செல்ல வேண்டிய அவசியத்தை நீக்குவதன் மூலம் வியட்நாம் மற்றும் இலங்கை இடையிலான பயண நேரத்தை கணிசமாகக் குறைக்கும் வகையில், அந்த வழித்தடத்தில் வாரத்திற்கு மூன்று இருவழி விமானச் சேவைகளை அந்த விமான நிறுவனம் இயக்கும்.

வியட்நாமின் முக்கிய பொருளாதார, வணிக மற்றும் விமானப் போக்குவரத்து மையமான ஹோ சி மின் நகரம் வழியாக, தென்கிழக்கு ஆசியா, அவுஸ்திரேலியா, சீனா, ஜப்பான் மற்றும் கொரியக் குடியரசு ஆகிய பகுதிகளில் உள்ள வியட்ஜெட் நிறுவனத்தின் விமானச் சேவை வலையமைப்பில் உள்ள இடங்களுக்கும் இலங்கை பயணிகள் பயணிக்க முடியும்.

தெற்காசியாவில் சுற்றுலா மற்றும் வணிக ரீதியாகத் தொடர்ந்து ஈர்ப்பை அதிகரித்து வரும் இலங்கையை வந்தடைய, இந்த புதிய வழித்தடமானது வியட்நாமிய சுற்றுலாப் பயணிகள் மற்றும் தொழில்முனைவோருக்கு மிகவும் வசதியான ஒரு வாய்ப்பை வழங்கும்.

இரு நாடுகளும் தங்களுக்கு இடையிலான பொருளாதாரத் தொடர்புகளையும் மக்கள் இடையிலான பரிமாற்றங்களையும் வலுப்படுத்தி வரும் நிலையில், இந்த நேரடி விமானச் சேவையானது வியட்நாம் மற்றும் இலங்கைக்கு இடையிலான சுற்றுலா, வர்த்தகம் மற்றும் முதலீட்டு உறவுகளை மேம்படுத்த உதவும் என்று எதிர்பார்க்கப்படுகிறது.

கொழும்பு இந்தியப் பெருங்கடலில் ஒரு முக்கிய கடல்சார் மற்றும் வணிக மையமாகத் திகழ்கிறது.

அதேவேளையில், ஹோ சி மின் நகரம் வியட்நாம் மற்றும் தென்கிழக்கு ஆசியாவிற்கான ஒரு முக்கிய பொருளாதார நுழைவாயிலாகச் செயல்படுகிறது.

இப்பிராந்தியத்திலுள்ள நாடுகளுடனான போக்குவரத்து இணைப்புகளை வலுப்படுத்தும் முயற்சிகளைத் தொடர்ந்து, தெற்காசியச் சந்தையில் ‘வியட்ஜெட்’ நிறுவனம் தனது சேவைகளை விரிவுபடுத்துவதில் ஹோ சி மின் நகரம் – கொழும்பு இடையிலான இந்த வழித்தடம் ஒரு புதிய மைல்கல்லாக அமைந்துள்ளது. 

தனது சேவை வலையமைப்பில் இலங்கையை இணைப்பதன் மூலம், தெற்காசியா மற்றும் தென்கிழக்கு ஆசியா இடையிலான பயணிகள் போக்குவரத்தை விரிவுபடுத்தவும், அதேவேளையில் இவ்விரு பிராந்தியங்களுக்கும் இடையே அதிகரித்து வரும் பயணத் தேவையைப் பூர்த்தி செய்யவும் முடியும் என்று எதிர்பார்க்கப்படுகிறது.