நேபாளத்தில் ஏற்பட்டுள்ள கடும் வெள்ளப்பெருக்கு மற்றும் அதனுடன் ஏற்பட்ட பேரழிவில் உயிரிழந்தவர்களுக்கு அஞ்சலி செலுத்தும் வகையில், அமெரிக்காவின் நியூயோர்க் நகரில் மெழுகுவர்த்தி ஏந்திய நினைவேந்தல் நிகழ்வு நடைபெற்றுள்ளது.
நேபாளத்தில் அண்மையில் பெய்த கனமழையால் பல பகுதிகளில் ஆறுகள் பெருக்கெடுத்து, பாரிய வெள்ளப்பெருக்கு ஏற்பட்டுள்ளது. பல இடங்களில் வெள்ளநீர் கட்டிடங்களின் பல மாடிகள் உயரத்திற்கு எழுந்து, வீடுகள் மற்றும் கட்டிடங்களுக்குள் பலத்த வேகத்தில் புகுந்ததாக தெரிவிக்கப்பட்டுள்ளது.
இதனால் மக்கள் பாதுகாப்பான இடங்களுக்கு செல்ல முடியாமல் சிக்கிக்கொண்டதுடன், வெள்ளநீரில் பலர் அடித்துச் செல்லப்பட்டதாகவும் தெரிவிக்கப்பட்டுள்ளது. வெள்ளம் வடிந்த பின்னர், பல பகுதிகளில் தடிமனான சேறு, குப்பைகள் மற்றும் கட்டிட இடிபாடுகள் படிந்துள்ளன. இதனால் மீட்பு மற்றும் நிவாரணப் பணிகள் பெரும் சவாலுக்கு உள்ளாகியுள்ளன.
இந்த பேரிடரில் உயிரிழந்தவர்களை நினைவுகூரும் வகையில் நியூயோர்க்கில் நடைபெற்ற மெழுகுவர்த்தி அஞ்சலி நிகழ்வில், நேபாளத்தைச் சேர்ந்தவர்கள் உள்ளிட்ட பலர் கலந்துகொண்டனர். உயிரிழந்தவர்களின் குடும்பங்களுக்கு ஆழ்ந்த இரங்கலைத் தெரிவித்த அவர்கள், பாதிக்கப்பட்ட மக்களுக்கு ஆதரவு வழங்கப்பட வேண்டும் என்றும் வலியுறுத்தினர்.
வெள்ளத்தால் வீடுகள், சாலைகள் மற்றும் அத்தியாவசிய உட்கட்டமைப்புகள் சேதமடைந்துள்ள நிலையில், பாதிக்கப்பட்ட பகுதிகளில் தொடர்ந்து மீட்பு நடவடிக்கைகள் முன்னெடுக்கப்பட்டு வருகின்றன.
நேபாளத்தின் பல்வேறு பகுதிகளில் ஏற்பட்டுள்ள இந்த இயற்கைப் பேரிடர், அந்நாட்டு மக்களிடையே பெரும் சோகத்தையும் அச்சத்தையும் ஏற்படுத்தியுள்ளது.
