அரசியலமைப்பின் 121(1) ஆவது பிரிவின் கீழ் சவால் செய்யப்பட்ட, ‘இலங்கை பட்டய ஊடக தொழில் வல்லுநர் நிறுவனம்’ (Chartered Institute of Media Professionals of Sri Lanka) தொடர்பான சட்டமூலம் குறித்த தனது தீர்மானத்தை உயர் நீதிமன்றம் வெளியிட்டுள்ளது.
உயர் நீதிமன்றின் தீர்மானத்துக்கு அமைவாக, குறித்த சட்டமூலத்தின் பல சரத்துகள் அரசியலமைப்பு விதிகளுக்கு முரணாக அமைந்துள்ளதாக நீதிமன்றம் கண்டறிந்துள்ளதாக சபாநாயகர் ஜகத் விக்ரமரத்ன இன்று (08) நாடாளுமன்றத்திற்குத் தெரிவித்தார்.
பிரிவு 3(1) தெளிவற்றதாகவும், பிரிவு 12(1) மற்றும் 14(1)(g) ஆகியவற்றுடன் முரண்படுவதாகவும் கருதப்பட்டது,.
எனவே, பிரிவு 84(2)-இன் கீழ் இதற்குச் சிறப்புப் பெரும்பான்மையின் ஒப்புதல் தேவைப்படுகிறது.
இப்பிரிவை நீக்கினால் அந்த முரண்பாடு நீக்கப்பட்டுவிடும்.
பிரிவு 4(o) ஆனது சரத்துகள் 12(1) மற்றும் 14(1)(g)-க்கு முரணாக இருப்பது கண்டறியப்பட்டது.
எனவே, நீதிமன்றம் பரிந்துரைத்தவாறு அதில் திருத்தம் செய்யப்படாவிட்டால், அதனைச் சிறப்புப் பெரும்பான்மையுடன் மட்டுமே நிறைவேற்ற முடியும்.
பிரிவு 5(4b)-ஆனது பிரிவு 12(1)-க்கு முரணானது என்று தீர்ப்பளிக்கப்பட்டது; இதற்குப் பிரிவு 84(2)-இன் கீழ் சிறப்புப் பெரும்பான்மை தேவைப்படுகிறது. அறிவுறுத்தப்பட்டவாறு திருத்தம் செய்யப்பட்டால் இந்த முரண்பாடு நீக்கப்படும்.
சட்டமூலத்தின் எஞ்சிய பிரிவுகள் அரசியலமைப்புச் சட்டத்திற்கு முரணானவை அல்ல எனத் தீர்மானிக்கப்பட்டது.
நீதிமன்றத்தால் கோடிட்டுக் காட்டப்பட்டுள்ள திருத்தங்கள் மற்றும் சிறப்புப் பெரும்பான்மைத் தேவைகளுக்கு உட்பட்டு, இந்தத் தீர்ப்பு நாடாளுமன்ற விவாதத்திற்கு வழிவகுக்கிறது.
