துபாயிலிருந்து டெல் அவிவ் நகருக்குச் சென்றுகொண்டிருந்த ஒரு வணிக ரீதியான விமானம், 180 பயணிகள் மற்றும் விமானக் குழுவினருக்குக் கடத்தல் அல்லது வேறு ஏதேனும் அச்சுறுத்தல் குறித்த அச்சத்தை ஏற்படுத்திய எச்சரிக்கை விடுக்கப்பட்டதைத் தொடர்ந்து, சவுதி அரேபியாவில் அவசரத் தரையிறக்கம் செய்தது.
விமானிகள் இடையே மோதல் நடந்ததாக வந்த தகவல்கள் மற்றும் கத்திக்குத்து காரணமாக ‘கொக்பிட்’ (விமானி அறை) பகுதியில் இரத்தம் சிந்தியிருந்ததாக இஸ்ரேலிய ஊடகங்களில் வெளியான செய்திகளுக்கு மத்தியில், ‘ஃப்ளைதுபாய்’ (flydubai) நிறுவனத்தின் FZ1073 விமானம் பாதுகாப்பாகத் தரையிறங்கியது.
இது விமானக் கடத்தல் அல்ல என்று இஸ்ரேலிய அரசு அதிகாரிகள் ஊடகங்களிடம் தெரிவித்தனர். இருப்பினும், விமானி அறையில் நடந்த மோதலின் தன்மை குறித்து ஊடகங்களில் ஊகங்கள் எழுந்தன.
விமானம் முதலில் சர்வதேச அவசரநிலையைக் குறிக்கும் வகையில் 7700 என்ற ‘ஸ்க்வாக்’ குறியீட்டை வெளியிட்டதாகவும், பின்னர் கடத்தல் அல்லது சட்டவிரோதத் தலையீட்டைக் குறிக்கும் வகையில் அதை 7500 குறியீடாக மாற்றியதாகவும் தகவல்கள் தெரிவிக்கின்றன.
இதைத் தொடர்ந்து, இஸ்ரேலியப் பிரதமர் பெஞ்சமின் நெதன்யாகு இந்த அவசரநிலையைக் கண்காணிக்க அவசரக் கூட்டங்களை அழைத்தமையும் குறிப்பிடத்தக்கது.
