ஹவுத்திகளுக்கு எதிராக சவுதி அரேபியாவின் மிகப்பெரிய தாக்குதல் திட்டம்!

யேமனில் ஈரான் ஆதரவு பெற்ற ஹவுத்தி கிளர்ச்சியாளர்களுக்கு எதிராக சவுதி அரேபியா தாக்குதல் நடத்தத் திட்டமிட்டு வருவதாக பிராந்திய மற்றும் மேற்கத்திய அதிகாரிகள் தெரிவித்துள்ளனர்.

செங்கடல் கப்பல் வழித்தடத்தைப் பாதுகாப்பதற்காகக் கடற்கரை வழியாக முன்னேறுவது அல்லது பல முனைகளில் தாக்குதல் நடத்துவது உள்ளிட்ட பல்வேறு வழிமுறைகள் இதில் பரிசீலிக்கப்பட்டு வருகின்றன.

ஆயத்தப் பணிகள் குறித்த விவரம் அறிந்த ஆறு பேர் தெரிவித்துள்ள தகவலின்படி, வரும் வாரங்களில் தொடங்கப்படவுள்ள இந்த நடவடிக்கையை, ரியாத்தின் மேற்பார்வையில் உள்ள யேமன் படைகள் களத்தில் முன்னின்று நடத்தும்.

அதேவேளையில் சவுதி அரேபியாவின் வான்வழித் தாக்குதல்களும் இதற்கு ஆதரவாக அமையும்.

யேமனில் ரியாத் மேற்கொள்ளும் நடவடிக்கைகளுக்கு அமெரிக்கா ஏற்கனவே உளவுத் தகவல்களை வழங்கி வருவதுடன், சில பிராந்திய மற்றும் ஐரோப்பிய நாடுகளும் அந்த அரசுக்கு முக்கியமாகத் தற்காப்பு சார்ந்த இராணுவ உதவிகளை அளித்து வருகின்றன.

இருப்பினும், சவுதியின் பங்காளிகள் நேரடிப் போர் நடவடிக்கைகளில் ஈடுபடுவார்கள் என்று எதிர்பார்க்கப்படவில்லை என்று பாதுகாப்பு விவகாரங்கள் குறித்துப் பேசுகையில் பெயர் குறிப்பிட விரும்பாதவர்கள் தெரிவித்தனர்.

தலைநகர் சனாவிலிருந்து ஹவுத்திகளால் வெளியேற்றப்பட்ட, சர்வதேச அளவில் அங்கீகரிக்கப்பட்ட அரசாங்கத்திற்கு ஆதரவாக, ஒரு அரபுக் கூட்டணியின் தலைமை தாங்கி சவுதி அரேபியா 2015-இல் அண்டை நாடான யேமனின் உள்நாட்டுப் போரில் களமிறங்கியது. 

2022-இல் போரிடும் தரப்பினரிடையே ஒப்புக்கொள்ளப்பட்ட போர்நிறுத்தம் பெரும்பாலும் கடைபிடிக்கப்பட்டு வந்தது.

ஆனால், ஈரானுடனான மோதலின் தொடர்ச்சியாக சவுதியின் கப்பல் போக்குவரத்து மற்றும் எண்ணெய் உள்கட்டமைப்புகள் மீது ஹவுத்திகள் ஏவுகணை மற்றும் ட்ரோன் தாக்குதல்களை நடத்திய இந்த ஆண்டில் அந்த நிலை மாறியது.

வளைகுடா மற்றும் யேமன் நாட்டு அதிகாரிகள் மற்றும் மேற்கத்திய இராஜதந்திரிகள் உள்ளிட்ட, இத்திட்டங்கள் குறித்து அறிந்தவர்களின் தகவல்படி, சவுதி அரேபியா திட்டமிட்டுள்ள தாக்குதலின் முக்கிய நோக்கம் ஒன்று உள்ளது.

அதாவது, கடந்த மாதம் கடற்கரை வழியாக முன்னேறி ‘பாப்-எல்-மண்டேப்’ (Bab el-Mandeb) நீரிணையைத் தங்கள் கட்டுப்பாட்டிற்குள் கொண்டுவந்ததன் மூலம் ஹவுத்திகள் அடைந்த விரைவான முன்னேற்றங்களை முறியடிப்பதே அந்த நோக்கமாகும். 

இத்திட்டம் குறித்து இதற்கு முன் எந்தத் தகவலும் வெளியாகவில்லை என்பது குறிப்பிடத்தக்கது.