டெல் அவிவ் நோக்கிச் சென்றுகொண்டிருந்தபோது அச்சத்தை ஏற்படுத்திய நிலைக்குச் சென்ற ஃப்ளைதுபாய் (Flydubai) விமானத்தின் துணை விமானி பயங்கரவாதத் தாக்குதல் ஒன்றை நடத்த முயன்றதாக ஐக்கிய அரபு அமீரகம் தெரிவித்துள்ளது.
ஓமன் நாட்டைச் சேர்ந்த ஹமாம் அல் ஹம்மாமி என்று அடையாளம் காணப்பட்ட துணை விமானி, விமானத்தின் கட்டுப்பாட்டு அறையில் (கொக்பிட்) வைத்து விமானியை கோடாரியால் தாக்கி, விமானத்தின் கட்டுப்பாட்டைக் கைப்பற்ற முயன்றதாக ஐக்கிய அரபு அமீரகத்தின் தலைமை அரசு வழக்கறிஞர் ஹமத் சைஃப் அல் ஷம்சி சனிக்கிழமை (03) தெரிவித்துள்ளார்.
இச்சம்பவம் தொடர்பான சூழல், நோக்கங்கள் மற்றும் ஏதேனும் தொடர்புகள் ஆகியவற்றைத் தீர்மானிக்கவும், அதேவேளையில் பௌதீக மற்றும் டிஜிட்டல் சான்றுகளை ஆய்வு செய்யவும் விசாரணைகள் நடைபெற்று வருவதாக அவர் மேலும் கூறினார்.
சிரியாவைச் சேர்ந்த தாயைக் கொண்டவரும் ஐக்கிய அரபு அமீரகத்தில் பிறந்தவருமான அந்த துணை விமானி, ஐக்கிய அரபு அமீரகத்தைச் சேர்ந்த விமான நிறுவனத்தில் பணியமர்த்தப்படுவதற்கு முன்பே, தீவிரவாதக் கருத்துகளைக் கொண்டிருக்கலாம் என்ற அச்சத்தின் காரணமாக ஓமன் நாட்டினால் விமானம் ஓட்டுவதிலிருந்து தடை செய்யப்பட்டிருந்தார் என்று ‘அசோசியேட்டட் பிரஸ்’ (AP) செய்தி நிறுவனத்திடம் வட்டாரங்கள் தெரிவித்தன.
அவர் ஒரு “தனிநபர் தாக்குதலாளியாக” செயல்பட்டாரா அல்லது ஏதேனும் தீவிரவாதக் குழுக்களுடன் தொடர்பு வைத்திருந்தாரா என்பதை உறுதி செய்வதற்கான விசாரணைகள் நடைபெற்று வருவதாக வளைகுடா நாட்டு இராஜதந்திரி ஒருவர் செய்தி நிறுவனத்திடம் தெரிவித்தார்.
விமானம் பறந்து கொண்டிருந்தபோது சக ஊழியரால் கத்தியால் குத்தப்பட்ட நிலையிலும், கொக்பிட் கதவைத் திறக்கப் போராடிய இந்திய விமானி ஸ்மித் மச்சார் ஒரு நாயகனாகப் போற்றப்படுகிறார்.
182 பேருடன் சென்ற அந்த விமானம் சுமார் ஒரு நிமிடத்தில் 33,000 அடி உயரத்திலிருந்து 17,000 அடி உயரத்திற்கு (10,000 மீட்டரிலிருந்து 5,100 மீட்டருக்கு) கீழே இறங்கிய நிலையில், பயணிகள் மற்றும் விமானக் குழுவினர் தாக்குதலில் ஈடுபட்டதாகக் கூறப்படும் நபரை அடக்கிக் கட்டுப்படுத்தினர்.
இதையடுத்து, துபாயிலிருந்து டெல் அவிவ் நோக்கிச் சென்று கொண்டிருந்த விமானம், சவுதி அரேபியாவில் அவசரமாகத் தரையிறக்கப்பட்டது; அங்கு துணை விமானி கைது செய்யப்பட்டார்.
ஐக்கிய அரபு அமீரகத்தின் மூத்த தூதரக ஆலோசகர் அன்வர் கர்காஷ், வெள்ளிக்கிழமை அன்று எக்ஸ் தளத்தில் வெளியிட்ட ஒரு பதிவில், ஃப்ளைதுபாய் மீதான தாக்குதலை ஒரு “ஆபத்தான பயங்கரவாதச் செயல்” என்று குறிப்பிட்டதோடு, ஒரு பேரழிவைத் தடுத்ததற்காக விமான கேப்டனைப் பாராட்டியமையும் குறிப்பிடத்தக்கது.
