பேருந்து நடத்துனர் மீது தாக்குதல் – மூவர் கைது!

பாணந்துறை பேருந்து நிலையம் அருகே தனியார் பேருந்து நடத்துனர் ஒருவர் மீது தாக்குதல் நடத்திய சம்பவம் தொடர்பில் மூவர் கைது செய்யப்பட்டுள்ளனர்.

பாணந்துறை தெற்கு பொலிஸ் நிலைய அதிகாரிகளால் கடந்த 2026 ஒக்டோபர் 30 ஆம் திகதி சந்தேகநபர்கள் கைது செய்யப்பட்டு, அன்றைய தினமே பாணந்துறை நீதிவான் நீதிமன்றத்தில் ஆஜர்படுத்தப்பட்டுள்ளனர்.

கைது செய்யப்பட்டவர்கள் ஹிரண, கொரக்கானை மற்றும் அல்பிட்டிய ஆகிய பகுதிகளைச் சேர்ந்த 21 மற்றும் 37 வயதுகளுக்கு இடைப்பட்டவர்கள் எனத் தெரிவிக்கப்பட்டுள்ளது.

தெஹிவளை பேருந்து நிறுத்தத்தில் பயணிகளை ஏற்றுவது தொடர்பாக ஏற்பட்ட முரண்பாடே இந்தத் தாக்குதலுக்குக் காரணம் என பொலிஸாரின் விசாரணைகளில் தெரியவந்துள்ளது.

மேலும், பாணந்துறை தனியார் பேருந்து நிலையத்தில் தூர இடங்களுக்குச் செல்லும் பேருந்துகளிடமிருந்து நடத்துனர்கள் கப்பம் பெறுவது தொடர்பான சம்பவத்துடன் இந்தத் தாக்குதல் தொடர்புபட்டுள்ளதாக சமூக ஊடகங்களில் தகவல்கள் பரவி வருகின்றன.

எனினும், இதுவரை முன்னெடுக்கப்பட்ட விசாரணைகளில் இவ்வாறான கப்பம் பெறும் சம்பவங்கள் தொடர்பில் உறுதியான தகவல்கள் எதுவும் வெளியாகவில்லை எனத் தெரிவிக்கப்படுகிறது.

இது தொடர்பான மேலதிக விசாரணைகளை பாணந்துறை தெற்கு பொலிஸார் முன்னெடுத்து வருகின்றனர்.