அண்டைய நாடான உக்ரைன் மீது ரஷ்யா படையெடுத்து ஓராண்டு நிறைவுக்கு வந்துள்ளது.
கடந்த ஆண்டு பெப்ரவரி 24ஆம் திகதி, உக்ரைனில் உள்ள ரஷ்யர்களை பாதுகாப்பதாக கூறி ‘சிறப்பு இராணுவ நடவடிக்கை’ எனும் பெயரில் தங்களது படைகளை அனுப்ப ரஷ்ய ஜனாதிபதி விளாடிமிர் புடின் உத்தரவிட்டார்.
ஆனால், நேட்டோ கூட்டணியுடன் உக்ரைன் இணைய விருப்பம் தெரிவித்ததற்கு கோபமடைந்த புடின் இந்த போரை தொடங்கியதாக மேற்கத்தியநாடுகள் குற்றஞ்சாட்டின.
எனினும், இதனை மறுக்காத புடின், உக்ரைன் நேட்டோவுடன் இணைத்துக்கொள்ளப்பட்டால், உக்ரைனுக்கு பேரழிவு ஏற்படுமென அச்சுறுத்தினார்.
புடினின் இந்த உத்தரவு உலகளவில் பெரும் அதிர்வலைகளை ஏற்படுத்தியதோடு, உக்ரைனுக்கு ஆதரவான அல்லது ரஷ்யாவிற்கு எதிரான அமெரிக்கா, பிரித்தானியா, ஜேர்மனி உள்ளிட்ட நாடுகளுக்கு ரஷ்யாவிற்கு பொருளாதார தடைகளை விதிக்க தூண்டியது.
மேற்கத்திய நாடுகள் உக்ரைன் மீது, 10க்கும் மேற்பட்ட பொருளாதார தடைகளை விதிக்க பதிலுக்கு ரஷ்யாவும் ஜேர்மனி, மோல்டோவா போன்ற நாடுகளுக்கான எரிவாயு குழாய்த் திட்டத்தை முடக்கியது.
குறிப்பாக இந்த போர் ஓராண்டு நீடிப்பதற்கு அமெரிக்கா, பிரித்தானியா, ஜேர்மனி உள்ளிட்ட நாடுகளே மிக முக்கிய நாடுகளாக உள்ளன. காரணம், உக்ரைனுக்கு போதிய ஆயுதங்கள் இல்லாத நிலையில், ரஷ்யாவின் எதிர்தாக்குதல்களை எதிர்கொள்ள நவீன போர் தளவாடங்களை வழங்கி உதவி வருகின்றது.
இந்த போர், இதுவரை இருதரப்புக்கும் மரணத்தையும் அழிவையும் கொண்டு வந்துள்ளது. போர் உலகம் முழுவதும் ஆற்றல், உணவு விலைகளை பாதித்துள்ளது மற்றும் ஐரோப்பிய மற்றும் உலகளாவிய பாதுகாப்பை தொடர்ந்து அச்சுறுத்துகிறது.
உக்ரைனில் ஆயிரக்கணக்கான பொதுமக்களின் உயிர்கள் காவுக்கொள்ளப்பட்டுள்ளதோடு, பல்லாயிரக்கணக்கானோரை வெளிநாடுகளுக்கு புலம்பெயர வழிவகுத்துள்ளது. அத்துடன் உக்ரைனின் முக்கிய உள்கட்டமைப்புகள் பேரழிவை சந்தித்துள்ளன.
பலம் வாய்ந்த இராணுவ படையினை கொண்டுள்ள ரஷ்யா, உக்ரைனின் முக்கிய நான்கு பகுதிளை கைப்பற்றி ரஷ்யாவுடன் இணைத்துக்கொண்டது. ஆனால், அதில் ஒரு பகுதியை பின்னர் உக்ரைன் படையினர் கைப்பற்றினர்.
விளாடிமிர் புடினின் படையெடுப்பு அவரது சொந்த நாட்டிற்கு பெரும் இராணுவ உயிரிழப்புகளை ஏற்படுத்தியுள்ளது. சில மதிப்பீடுகள் இறந்த ரஷ்ய வீரர்களின் எண்ணிக்கை பல்லாயிரக்கணக்கானதாகக் கூறுகின்றன.
நூறாயிரக்கணக்கான ரஷ்ய குடிமக்கள் இராணுவத்தில் சேர்க்கப்பட்டுள்ளனர் மற்றும் தண்டனை விதிக்கப்பட்ட கொலையாளிகள் உட்பட ரஷ்ய கைதிகள் உக்ரைனில் சண்டையிட ஆட்சேர்ப்பு செய்யப்பட்டுள்ளனர்.
போர் நீடித்துக்கொண்டே சென்றாலும், இதுவரை இருதரப்பிலும் எந்த அளவிலான பாதிப்பு ஏற்பட்டுள்ளது என உத்தியோகபூர்வ தகவல் இல்லை.
இதற்கிடையில், இன்றைய ஓராண்டு நிறைவையொட்டி ரஷ்யா தனது படைகளை உக்ரைனில் இருந்து விலக்கிக் கொள்ளவும், சண்டையை முடிவுக்குக் கொண்டுவரவும் கோரும் தீர்மானத்திற்கு ஆதரவாக ஐக்கிய நாடுகளின் பொதுச் சபையில் தீர்மானம் நிறைவேற்றப்பட்டுள்ளது.
