யென் நாணயத்தின் மதிப்பு கடந்த 40 ஆண்டுகளில் இல்லாத அளவுக்குக் குறைந்ததைத் தொடர்ந்து, அதன் சரிவைத் தடுக்கத் தாங்கள் கடந்த வாரம் கூட்டாகத் தலையிட்டதை ஜப்பானும் அமெரிக்காவும் உறுதிப்படுத்தியுள்ளன.
கிழக்கு ஜப்பானைத் தாக்கிய பேரழிவுமிக்க நிலநடுக்கம் மற்றும் சுனாமியைத் தொடர்ந்து, ‘யென்’ (yen) நாணயத்தின் மதிப்பைக் குறைப்பதற்காக இரு நாடுகளும் ஒருங்கிணைந்து நடவடிக்கை எடுத்த 2011-ஆம் ஆண்டிற்குப் பிறகு மேற்கொள்ளப்படும் முதல் கூட்டு நடவடிக்கையாக இது அமைந்துள்ளது.
ஜப்பானின் நிதியமைச்சகம் மற்றும் அமெரிக்கச் திறைசேரியின் செயலாளர் ஸ்காட் பெசென்ட் ஆகிய இருவரும், எதிர்காலத்தில் மேலும் கூட்டு நடவடிக்கைகளை மேற்கொள்ளத் தயங்கப்போவதில்லை என்று கூறியுள்ளனர்.
யென் மற்றும் ஜப்பானிய அரசுப் பத்திரங்களின் பெருமளவிலான விற்பனை உலகப் பொருளாதாரத்தில் தாக்கத்தை ஏற்படுத்துவதைத் தடுக்க இரு நாடுகளும் மேற்கொள்ளும் முயற்சிகளை இது எடுத்துக்காட்டுகிறது.
இத்தகைய தாக்கம் வொஷிங்டனுக்கான கடன் வாங்கும் செலவுகளை அதிகரிக்கவும் வாய்ப்புள்ளது.
அமெரிக்கா போன்ற மற்ற முக்கியப் பொருளாதார நாடுகளை விட ஜப்பான் மிகக் குறைந்த மத்திய வங்கி வட்டி விகிதங்களைக் கொண்டிருப்பதால், யென் வரலாற்று ரீதியாக பலவீனமாக உள்ளது.
இது ஜப்பானிய நாணயத்தை சர்வதேச முதலீட்டாளர்களுக்கு அவ்வளவு கவர்ச்சிகரமானதாக ஆக்குவதில்லை.
ஜப்பானிய வங்கி கடைசியாக ஜூன் மாதத்தில் வட்டி விகிதங்களை உயர்த்தியது.
அப்போது அதன் முக்கிய வட்டி விகிதம் 1%-ஆக அதிகரிக்கப்பட்டது – இது 1995 செப்டம்பர் மாதத்துக்குப் பிறகு எட்டப்பட்ட மிக உயர்ந்த அளவாகும்.
ஒப்பிட்டுப் பார்க்கையில், அமெரிக்க ஃபெடரல் ரிசர்வ் வங்கியின் அடிப்படை வட்டி விகிதம் 3.50% முதல் 3.75% வரையிலான வரம்பில் உள்ளது.
இவை தவிர, பல தசாப்தங்களாகத் தொடர்ந்து குறைந்து வரும் பணிபுரியும் வயதுடைய மக்கள் தொகை, குறைந்த உற்பத்தித்திறன் மற்றும் அமெரிக்க டொலர் மதிப்பில் விலை நிர்ணயம் செய்யப்படும் எரிசக்தி இறக்குமதிகளைச் சார்ந்திருத்தல் போன்ற பிற சவால்களையும் ஜப்பான் எதிர்கொண்டு வருகிறது.
