மேல்மருவத்தூர் ஆதிபராசக்தி சித்தர் பீடத்தின் ஆன்மிக குருவான பங்காரு அடிகளார் திடீரென ஏற்பட்ட மாரடைப்பு காரணமாக நேற்று தனது 82 ஆவது வயதில் காலமானார்.
இந்நிலையில் அவரது உடல் பொதுமக்களின் அஞ்சலிக்காக, அவரது வீட்டில் வைக்கப்பட்டுள்ள நிலையில் ஆயிரக்கணக்கான மக்கள் மேல்மருவத்தூருக்கு வருகைதந்து அஞ்சலி செலுத்தி வருகின்றனர்.
இதனிடையே பங்காரு அடிகளாருக்கு அஞ்சலி செலுத்துவதற்காக தமிழக முதலமைச்சர் மு.க.ஸ்டாலின் இன்று மேல்மருவத்தூர் செல்லவுள்ளார் எனவும், அவரது உடல் அரசு மரியாதையுடன் இன்று நல்லடக்கம் செய்யப்படும் எனவும் தெரிவிக்கப்பட்டுள்ளது.
இந்நிலையில் பங்காரு அடிகளாரின் உடலுக்கு அஞ்சலி செலுத்த பல்லாயிரக்கணக்கான மக்கள் கூட வாய்ப்பு உள்ளதால் சுமார் 2,000 பொலிஸார் பாதுகாப்பு பணியில் ஈடுபடுத்தப்பட்டுள்ளமை குறிப்பிடத்தக்கது.
