“இந்த ஆண்டில் மாத்திரம் சுமார் 115 சிறுவர்கள் வீதி விபத்துகளினால் உயிரிழந்துள்ளனர்” என சிரேஷ்ட பொலிஸ் அத்தியட்சகர் மனோஜ் ரணகல தெரிவித்துள்ளார்.
கொழும்பில் நடைபெற்ற ஊடகவியலாளர் சந்திப்பிலேயே அவர் இதனைத் தெரிவித்துள்ளார். இது குறித்து அவர் மேலும் தெரிவிக்கையில் ”கடந்த ஜனவரி மாதம் 1ஆம் திகதி முதல் ஒக்டோபர் 15ஆம் திகதி வரையில் இந்த மரணங்கள் பதிவாகியுள்ளன. பெரும்பாலும் சாரதிகள் கவனக்குறைவாக வாகனம் செலுத்துவதே இவ் உயிரிழப்புகளுக்குக் காரணமாக உள்ளது.
கடந்த 2022ஆம் ஆண்டில் 2,539 வீதி விபத்துகள் பதுவாகியிருந்தன. இந்த வருடம் ஒக்டோபர் மாதம் 15 திகதி வரையில் 1,790 வீதி விபத்துக்கள் பதிவாகியுள்ளன. இதில் 18 வயதுக்குட்பட்ட 129 பேர் உயிரிழந்தனர். அதேநேரம் 115 சிறுவர்களையும் இழந்துள்ளோம். இது கவலையளிக்கும் விடயமாகும். மோட்டார் சைக்கிள் விபத்துக்களே அதிகளவில் இடம்பெறுகின்றன.
குறிப்பாக சிறுவர்களும் வீதி விபத்துக்களில் இறக்கின்றனர். தாய் மற்றும் தந்தை ஹெல்மெட் அணிந்து தங்கள் மகனையோ மகளையோ நடுவில் வைத்து ஏற்றிச் செல்கிறார்கள். நடுவில் செல்லும் அவருக்கு ஹெல்மெட் இல்லை, அன்புள்ளவர்கள் அவ்வாறு செய்ய மாட்டார்கள். விபத்து ஏற்பட்டால் அந்த பிள்ளைக்கே அதிக பாதிப்பு என்பதை உணர்ந்துக்கொள்ள வேண்டும்” இவ்வாறு மனோஜ் ரணகல தெரிவித்துள்ளார்.
