2025 இந்தியன் பிரீமியர் லீக் இடைநிறுத்தப்பட்டுள்ளது.
ஏப்ரல் 22 அன்று ஜம்மு காஷ்மீரின் பஹல்காமில் நடந்த பயங்கரவாத தாக்குதலைத் தொடர்ந்து, இந்தியாவிற்கும் பாகிஸ்தானுக்கும் இடையிலான இராணுவ பதட்டங்கள் கடுமையாக அதிகரித்ததைத் தொடர்ந்து இந்த அறிவிப்பு வந்துள்ளது.
ஜம்மு மற்றும் பதான்கோட்டின் அருகிலுள்ள பகுதிகளில் விமானத் தாக்குதல் எச்சரிக்கைகள் காரணமாக, தர்மசாலாவில் பஞ்சாப் கிங்ஸ் மற்றும் டெல்லி கேபிடல்ஸ் இடையேயான போட்டி பாதியில் கைவிடப்பட்ட ஒரு நாளுக்குப் பின்னர் இந்த தீர்மானம் எடுக்கப்பட்டுள்ளது.
இடைநீக்கம் செய்யப்பட்ட நேரத்தில், 12 லீக் போட்டிகள் மற்றும் கொல்கத்தாவில் நடைபெறும் இறுதிப் போட்டி உட்பட நான்கு நாக் அவுட் ஆட்டங்கள் இன்னும் எஞ்சியுள்ளன.
வீரர்கள், துணை ஊழியர்கள் மற்றும் ரசிகர்களின் பாதுகாப்புதான் முதன்மையான கவலையாகக் குறிப்பிட்டு, போட்டி அதிகாரிகளுடனான அவசரக் கூட்டத்திற்குப் பின்னர் இந்திய கிரிக்கெட் கட்டுப்பாட்டு வாரியம் (BCCI) வெள்ளிக்கிழமை (09) இந்த அறிவிப்பை வெளியிட்டது.
மீதமுள்ள போட்டிகளுக்கான புதுப்பிக்கப்பட்ட திகதிகளை ஐபிஎல் மற்றும் BCCI உரிய நேரத்தில் அறிவிக்கும்.
முன்னதாக, மே 8 ஆம் திகதி தர்மசாலாவில் பஞ்சாப் கிங்ஸ் மற்றும் டெல்லி கேபிடல்ஸ் அணிகளுக்கு இடையேயான போட்டி, அருகிலுள்ள ஜம்மு மற்றும் பதான்கோட்டில் விமானத் தாக்குதல் எச்சரிக்கை காரணமாக பாதியிலேயே நிறுத்தப்பட்டது.
தாக்குதல் நடத்தப்படலாம் என்ற அச்சம் காரணமாக பார்வையாளர்கள் வெளியேற்றப்பட்டனர்.
இது போட்டியின் நம்பகத்தன்மை குறித்து கடுமையான கவலைகளை எழுப்பியது.
ஐபிஎல் தலைவர் அருண் துமல் ஆரம்பத்தில் மே 9 ஆம் திகதி லக்னோ சூப்பர் ஜெயண்ட்ஸ் மற்றும் ராயல் சேலஞ்சர்ஸ் பெங்களூரு அணிகளுக்கு இடையிலான போட்டி திட்டமிட்டபடி நடைபெறும் என்று குறிப்பிட்ட போதிலும், மோசமடைந்து வரும் பாதுகாப்பு நிலைமை தலைகீழாக மாற வழிவகுத்தது.
மறு அறிவிப்பு வரும் வரை லீக் இடைநிறுத்தப்பட்டுள்ளதாகவும், அதிகாரப்பூர்வ உத்தரவுகளுக்காகக் காத்திருக்கும்போது அதிகாரிகளுடன் நெருக்கமாக ஒருங்கிணைந்து செயல்படுவதாகவும் பிசிசிஐ உறுதிப்படுத்தியது.
இந்த முடிவு வெளிநாட்டு கிரிக்கெட் வாரியங்களின் கவனத்தையும் ஈர்த்துள்ளது.
ஏராளமான சர்வதேச வீரர்கள் மற்றும் பயிற்சியாளர்கள் இதில் ஈடுபட்டுள்ளதால், கிரிக்கெட் அவுஸ்திரேலியா வெள்ளிக்கிழமை ஒரு அறிக்கையை வெளியிட்டது.
இது நிலைமையை உன்னிப்பாகக் கண்காணித்து வருவதாகவும், இந்தியாவில் உள்ள அதன் பணியாளர்களுடன் தொடர்பில் இருப்பதாகவும் கூறியது.
இந்தியாவிற்கும் பாகிஸ்தானுக்கும் இடையிலான பதட்டமான சூழ்நிலை காரணமாக ஐபிஎல் 2025 இல் பங்கேற்கும் வெளிநாட்டு வீரர்கள் ஏற்கனவே கவலை தெரிவித்துள்ளனர்.
இந்த நடவடிக்கை, இந்த பதற்றமான காலங்களில் அனைத்து உரிமையாளர்களின் வெளிநாட்டு வீரர்களும் அந்தந்த நாடுகளுக்குத் திரும்ப அனுமதிக்கப்படுவதை உறுதி செய்யும்.
புதன்கிழமை இரவு பாகிஸ்தான் இராணுவம் 15 இந்திய நகரங்களை குறிவைத்து ஒருங்கிணைந்த அலை அலையான ட்ரோன் மற்றும் ஏவுகணைத் தாக்குதல்களை நடத்தியபோது பதட்டங்கள் கணிசமாக அதிகரித்தன.
ஜம்மு மற்றும் காஷ்மீரில் உள்ள அவந்திபோரா மற்றும் ஸ்ரீநகர்; பஞ்சாபில் உள்ள அமிர்தசரஸ், ஜலந்தர், லூதியானா, கபுர்தலா, ஆதம்பூர் மற்றும் பதிண்டா; சண்டிகர்; ராஜஸ்தானில் உள்ள நல், பலோடி மற்றும் உத்தர்லை; மற்றும் குஜராத்தில் உள்ள பூஜ் ஆகியவை தாக்கப்பட்ட முக்கிய இடங்கள்.
இதற்கு பதிலளிக்கும் விதமாக, வெள்ளிக்கிழமை காலை இந்தியா ஒரு எதிர் தாக்குதலைத் தொடங்கியது.
லாகூருக்கு அருகிலுள்ள பாகிஸ்தான் வான் பாதுகாப்பு நிறுவலை அழிக்க ட்ரோன்களை நிறுத்தியது.
சத்வாரி, ஆர்எஸ் புரா, ஆர்னியா மற்றும் சம்பா உள்ளிட்ட ஜம்மு பிராந்தியத்தில் கூடுதல் தாக்குதல் முயற்சிகள் இந்திய வான் பாதுகாப்பு அமைப்புகளால் வெற்றிகரமாக முறியடிக்கப்பட்டன, இதனால் உயிரிழப்புகள் மற்றும் சேதங்கள் தவிர்க்கப்பட்டமையும் குறிப்பிடத்தக்கது.
