யாழ்ப்பாணப் பல்கலைக்கழகத்துக்கும் அமெரிக்கப் பல்கலைக்கழகத்துக்கும் இடையில் புரிந்துணர்வு ஒப்பந்தம் ஒன்றை மேற்கொள்ள அமைச்சரவை அங்கீகாரம் வழங்கியுள்ளது.
கல்விசார் சிறப்புத் தேர்ச்சி, அறிவு விருத்தி மற்றும் ஆய்வுகளை மேம்படுத்துவதுடன், இலங்கைக்கும் அமெரிக்காவுக்கும் இடையிலான நட்புறவை மேலும் வலுப்படுத்தும் நோக்கில் இந்த ஒப்பந்தம் முன்மொழியப்பட்டுள்ளது.
இதற்கமைய, இலங்கையின் யாழ்ப்பாணப் பல்கலைக்கழகத்துக்கும் அமெரிக்காவின் தென் இலினோய் பல்கலைக்கழகத்தின் நம்பிக்கைப் பொறுப்புச் சபைக்கும் இடையில் இந்தப் புரிந்துணர்வு ஒப்பந்தம் கைச்சாத்திடப்படவுள்ளது.
இந்த ஒப்பந்தத்தின் ஊடாக இரு பல்கலைக்கழகங்களினதும் விரிவுரையாளர்களைப் பரிமாற்றம் செய்தல், பட்டப்படிப்பு மற்றும் பட்டப்பின்படிப்பு மாணவர்களின் பரிமாற்றங்களை ஊக்குவித்தல், கூட்டு ஆய்வுகள், பயிலமர்வுகள், கருத்தரங்குகள் மற்றும் மாநாடுகளை ஏற்பாடு செய்தல் உள்ளிட்ட நடவடிக்கைகளை முன்னெடுக்கத் திட்டமிடப்பட்டுள்ளது.
மேலும், இரு பல்கலைக்கழகங்களுக்கும் இடையிலான தகவல் பரிமாற்றங்களை இலகுபடுத்தும் வகையில் இணையத்தளங்களைத் தொடர்புபடுத்தவும் முன்மொழியப்பட்டுள்ளது.
குறித்த புரிந்துணர்வு ஒப்பந்தம் கைச்சாத்திடப்படும் திகதி முதல் ஐந்து ஆண்டுகளுக்கு நடைமுறையில் இருக்கும்.
இந்நிலையில், கல்வி, உயர்கல்வி மற்றும் தொழிற்கல்வி அமைச்சராகப் பிரதமர் சமர்ப்பித்த இந்த யோசனைக்கு அமைச்சரவை அங்கீகாரம் வழங்கியுள்ளமை குறிப்பிடத்தக்கது.
