விமர்சனங்களுக்கு சட்டமன்றத்தில் தமிழக முதல்வர் விஜய் பதிலடி!

தமிழ்நாடு சட்டமன்றத்தில் இன்று (23) காலை ஆற்றிய உரையில் தனது ‘தமிழக வெற்றிக் கழகத்தை’ வெறும் ‘நடிகரின் கட்சி’ என்று விமர்சிப்பவர்களுக்குப் பதிலடி கொடுத்த தமிழக முதல்வர் ஜோசப் விஜய், ஏப்ரல் – மே மாதத் தேர்தல்களில் அக்கட்சி பெற்ற வெற்றியை அவர்களுக்குக் கூர்மையான முறையில் நினைவூட்டினார்.

இந்தி பேசாத மாநிலங்கள் மீது மத்திய அரசு இந்தியை ‘திணிப்பது’ முதல் நீட் (NEET) தேர்வை இரத்து செய்ய வேண்டும் என்ற கோரிக்கைகள் வரை பல்வேறு விவகாரங்களை உள்ளடக்கிய ஒரு வலுவான உரையின் மூலம், தமிழக வெற்றிக் கழக (TVK) கட்சியின் அரசியல் நிலைத்தன்மை மற்றும் தனது நிர்வாகத் திறன் ஆகியவற்றைக் குறித்து சந்தேகம் கொண்டவர்களையும் விமர்சிப்பவர்களையும் அவர் சாடினார்.

“சதித்திட்டங்கள் மற்றும் தடைகளை” முறியடித்தே தங்கள் கட்சி வளர்ந்து வந்ததாகவும், தானோ அல்லது தனது கட்சியோ காணாமல் போய்விடும் எண்ணம் கொண்டிருக்கவில்லை என்றும் விஜய் சட்டமன்றத்தில் நினைவுகூர்ந்தார். 

“எங்களுக்கு அதிகாரம் எளிதாகக் கிடைத்துவிடவில்லை. தமிழ் மக்களின் இதயத்தில் இடம்பிடிக்க நாங்கள் சந்தித்த போராட்டங்கள் எங்களுக்கு மட்டுமே தெரியும். சிலர் ஒன்றும் புரியாதது போல நடித்து, ‘இவர் வெறும் நடிகர், இது வெறும் நடிகரின் கட்சி’ என்று கூறி எங்களை விமர்சிக்கிறார்கள்.”

“அத்தகைய விமர்சனங்களைப் பற்றி நாங்கள் கவலைப்படுவதில்லை. 

எங்கள் அரசியல் வெளிப்படையானது. நாங்கள் 35 சதவீத வாக்குகளைப் பெற்றோம். நாங்கள் மிக எளிதாக ஆட்சிக்கு வந்ததாகச் சிலர் கூறுகிறார்கள்… ஆனால் நாங்கள் சதித்திட்டங்களையும் கட்டுப்பாடுகளையும் எதிர்கொண்டோம். அனைத்தையும் எதிர்கொண்டுதான் நாங்கள் இன்று இந்த நிலையில் இருக்கிறோம். இன்னும் வெகுதூரம் செல்ல வேண்டியுள்ளது.”

நாட்டில் மருத்துவப் படிப்புகளுக்கான சேர்க்கைக்கு நடத்தப்படும் ஒரே தகுதித் தேர்வான ‘நீட்’ குறித்த விவகாரத்தில், இம்முறை “சமத்துவமின்மையை உருவாக்குகிறது” என்று கூறிய விஜய், அதனை இரத்து செய்யுமாறு வலியுறுத்தினார்.

கடந்த சில ஆண்டுகளாக நீட் தேர்வு பெரும் சர்ச்சைக்குரிய விவகாரமாக இருந்து வருகிறது.

தேர்வு குறித்த மன அழுத்தத்தால் மாணவர்கள் தற்கொலை செய்துகொள்வது முதல், நாட்டின் மருத்துவக் கல்வியின் நம்பகத்தன்மையையே கேள்விக்குள்ளாக்கும் வகையில் வினாத்தாள்கள் கசிவது வரை பல்வேறு சிக்கல்கள் இதில் அடங்கும். 

எனவே, இத்தேர்வை இரத்து செய்துவிட்டு, 12-ஆம் வகுப்பு மதிப்பெண்களின் அடிப்படையில் மருத்துவப் படிப்புக்கான இடங்களை ஒதுக்க வேண்டும் என்று தமிழ்நாடு தொடர்ந்து வலியுறுத்தி வருகிறது.

மேலும், கடந்த காலங்களில் இவ்விடயத்தில் வன்முறைக் கலவரங்களைக் கண்ட தென்னிந்திய மாநிலத்தில் ஒரு உணர்ச்சிப்பூர்வமான பிரச்சினையாக விளங்கும் இந்தி ‘திணிப்பு’ குறித்து, புதிய முதலமைச்சர், தற்போதுள்ள இருமொழிக் கொள்கையான தமிழ் (மாநில மொழியாக) மற்றும் ஆங்கிலம் (உலகளாவிய மொழியாக) ஆகியவை போதுமானதாகவே உள்ளது என்று வலியுறுத்தினார்.

விஜய் உரையாற்றவிருந்த கரூர் தேர்தல் பொதுக்கூட்டத்தில் ஏற்பட்ட நெரிசல் மற்றும் உயிரிழப்புச் சம்பவம் குறித்து அவர் கூறியதாவது: “41 பேர் உயிரிழந்த அந்தத் துயரச் சம்பவம் குறித்த என் வேதனையை வார்த்தைகளால் விவரிக்க முடியாது; அந்த வலி என்னை விட்டு ஒருபோதும் நீங்காது. 

ஆனால், அதற்கான பழியையும் அவர்கள் எங்கள் மீதே சுமத்தினார்கள். இது மிகவும் கொடுமையானது. அரசியல் இவ்வளவு கொடூரமானதா?”

கூட்ட நெரிசலைக் கட்டுப்படுத்துவதற்கான காவல்துறை அறிவுறுத்தல்களை விஜய் மற்றும் அவரது கட்சியான ‘தமிழக வெற்றிக் கழகம்’ (TVK) பின்பற்றவில்லை என்று குற்றம் சாட்டியிருந்த முன்னாள் ஆளும் கட்சியான திராவிட முன்னேற்றக் கழகம் (DMK) மற்றும் முன்னாள் முதல்வர் மு.க. ஸ்டாலின் ஆகியோரை நோக்கியே இந்த எதிர்வினை அமைந்திருந்ததாகப் பரவலாகக் கருதப்பட்டது.

அதனைத் தொடர்ந்து, முதல்வர் விஜய் ஒரு சுருக்கமான அரசியல் வரலாற்றுப் பாடத்தையும் முன்வைத்தார்; இதில் சி.என். அண்ணாதுரை தலைமையிலான திமுக வெற்றி பெற்ற 1967 மற்றும் 1977-ஆம் ஆண்டுத் தேர்தல்களையும், பின்னர் திமுகவின் தீவிர அரசியல் எதிரியாக மாறிய, மூத்த நடிகரும் அரசியல்வாதியும் முதல்வருமான எம்.ஜி. ராமச்சந்திரன் தலைமையிலான அனைத்திந்திய அண்ணா திராவிட முன்னேற்றக் கழகத்தின் (AIADMK) வெற்றிகளையும் அவர் நினைவுபடுத்தினார்.

“1967-இல் அண்ணா சாமானிய மக்களுக்கான அரசை அமைத்தார். 1977-இல் எம்.ஜி.ஆர். சாமானிய மக்களுக்கான அரசை அமைத்தார். இப்போது, ​​2026-இல் விஜய்யின் அரசும் சாமானிய மக்களுக்கானதாகவே அமையும்,” என்று கூறிய அவர், வாரிசு அரசியல் விவகாரத்தில் திமுகவையும் மறைமுகமாகச் சாடினார்.

“எங்கள் அரசியல் என்பது ஒரு குறிப்பிட்ட குடும்பத்திற்கு (திமுக தலைவர் ஸ்டாலின் மற்றும் அவரது மகனும் முன்னாள் துணை முதல்வருமான வாரிசு உதயநிதி ஸ்டாலின் ஆகியோரை மறைமுகமாகக் குறிப்பிடும் வகையில்) முக்கியத்துவம் அளிப்பதல்ல… மாறாக, தமிழ்நாட்டில் உள்ள ஒவ்வொரு குடும்பத்திற்கும் முக்கியத்துவம் அளிப்பதே ஆகும். அதுவே எங்கள் அரசியல்… அதுவே எங்கள் நிர்வாகம்,” என்று அவர் உறுதியாகக் கூறினார்.