2026 ஆம் ஆண்டில் 250,000 இலங்கையர்களுக்கு வெளிநாட்டு வேலைவாய்ப்பு வாய்ப்புகளைப் பெற்றுக்கொடுப்பதற்கான இலக்கை நிர்ணயித்துள்ளதாக இலங்கை வெளிநாட்டு வேலைவாய்ப்புப் பணியகம் (SLBFE) தெரிவித்துள்ளது.
இலங்கை அரசாங்கம் மற்றும் SLBFE-இல் பதிவுசெய்யப்பட்ட ஆள்சேர்ப்பு முகவர் நிலையங்கள் ஊடாக இந்த வேலைவாய்ப்புகள் ஏற்படுத்திக் கொடுக்கப்படும் என்று அந்தப் பணியகம் தெரிவித்தது.
மத்திய கிழக்கில் நிலவும் மோதல் காரணமாக வெளிநாடுகளில் வேலை தேடும் இலங்கையர்களின் எண்ணிக்கையில் சற்று சரிவு ஏற்பட்டிருந்தாலும், பாதுகாப்பான இடங்களிலுள்ள அதிக ஊதியம் தரும் வேலைவாய்ப்புகளை நோக்கித் தொழிலாளர்களை வழிநடத்துவதற்கான நடவடிக்கைகளை அந்த ஆணையம் மேற்கொண்டு வருகிறது.
இதன்படி, இவ்வருடத்தில் இதுவரை 143,087 இலங்கையர்கள் வெளிநாட்டு வேலைவாய்ப்புக்காகச் சென்றுள்ளனர்.
இவர்களில் 92,590 பேர் ஆண் தொழிலாளர்கள்; 50,497 பேர் பெண் தொழிலாளர்கள் ஆவர்.
இதற்கிடையில், இலங்கை புலம்பெயர் தொழிலாளர்களிடையே மிகவும் பிரபலமான இடங்களுள் ஒன்றான இஸ்ரேலுக்கு, 14,000 இலங்கைத் தொழிலாளர்களை அனுப்ப இலங்கை வெளிநாட்டு வேலைவாய்ப்புப் பணியகம் (SLBFE) திட்டமிட்டுள்ளது.
இதுவரை 7,873 தொழிலாளர்கள் இஸ்ரேலில் பணிபுரிவதற்காகப் புறப்பட்டுச் சென்றுள்ளனர்.
தென் கொரியாவிற்கு மேலும் 8,000 தொழிலாளர்களை அனுப்ப வெளிநாட்டு வேலைவாய்ப்பு பணியகம் திட்டமிட்டுள்ளது.
ஏற்கனவே 4,794 தொழிலாளர்கள் அங்கு வேலைக்காகச் சென்றுள்ளனர்.
2026-ஆம் ஆண்டில் இதுவரை 73,623 இலங்கையர்கள் திறன்சார் பணிகளுக்காகவும், 69,494 தொழிலாளர்கள் திறன் சாராத பணிகளுக்காகவும் வெளிநாடுகளுக்குச் சென்றுள்ளனர்.
இதற்கிடையில், 2026-ஆம் ஆண்டின் முதல் ஆறு மாதங்களில் (ஜனவரி முதல் ஜூன் வரை), வெளிநாடுகளில் பணிபுரியும் இலங்கையர்கள் 4.6 பில்லியன் அமெரிக்க டொலர்களை நாட்டிற்கு அனுப்பியும் உள்ளனர்.
