கடந்த 75 ஆண்டுகளில் இல்லாத அளவுக்கு மிக வலுவான ‘எல் நினோ’ (El Niño) காலநிலை மாற்றம் இந்த ஆண்டின் இறுதிக்குள் ஏற்படுவதற்கான சாத்தியக்கூறுகள் 90 சதவீதமாக அதிகரித்துள்ளதாக வளிமண்டலவியல் திணைக்களம் எச்சரித்துள்ளது.
இது குறித்துப் பேசிய வளிமண்டலவியல் திணைக்களத்தின் பணிப்பாளர் நாயகம் அஜித் விஜேமன்னே, “உலகளாவிய முன்னறிவிப்புகளின்படி இந்த எல் நினோ நிலைமை படிப்படியாக தீவிரமடைந்து வருகிறது. 1950 ஆம் ஆண்டு முதல் கடந்த 75 ஆண்டுகளில் பதிவான எல் நினோ நிகழ்வுகளுடன் ஒப்பிடுகையில், இந்த ஆண்டின் இறுதிக்குள் இது மிகவும் தீவிரமான எல் நினோவாக மாறுவதற்கான நிகழ்தகவு 70% அதிகமாக உள்ளது” எனத் தெரிவித்துள்ளார்.
இதனிடையே, நாட்டின் பல பகுதிகளில் வறண்ட வானிலை நிலவி வருவதால் தண்ணீரைச் சிக்கனமாகப் பயன்படுத்துமாறு நீர்ப்பாசனத் திணைக்களம் கோரிக்கை விடுத்துள்ளது.
இது தொடர்பாகப் பேசிய நீர்ப்பாசன (நீர் மேலாண்மை) பணிப்பாளர் பொறியியலாளர் எச்.என்.பி.எஸ்.டி. ஹெரத், திணைக்களத்தின் கட்டுப்பாட்டிலுள்ள 74 பிரதான நீர்த்தேக்கங்களின் நீர்மட்டம் தற்போது 37% ஆகக் குறைந்துள்ளதாகச் சுட்டிக்காட்டினார்.
இருப்பினும், இந்த நீர்மட்டம் யால பருவச் செய்கைக்கும், நவம்பர் – டிசம்பர் மழைக்காலம் வரையிலான தேவைகளுக்கும் போதுமானதாக இருக்கும் என அவர் எதிர்பார்க்கிறார்.
அதேவேளை, வறண்ட வானிலை நிலவியபோதிலும் தீவு முழுவதிலுமுள்ள நீர் சுத்திகரிப்பு நிலையங்கள் 100% அதிகபட்ச கொள்ளளவில் இயங்கி வருவதாகவும், நீர் விநியோகத்தில் எவ்விதத் தடங்கலும் ஏற்படுத்தப்படவில்லை என்றும் தேசிய நீர் வழங்கல் மற்றும் வடிகாலமைப்புச் சபையின் தலைவர் பொறியியலாளர் சந்தன பண்டாரா தெரிவித்துள்ளார். இருப்பினும், சில பாசனக் குளங்களில் நீர்மட்டம் 56% க்கும் அதிகமாகச் சரிந்துள்ளதால் பொதுமக்கள் தண்ணீரைப் பொறுப்புடன் பயன்படுத்துமாறு கேட்டுக்கொள்ளப்பட்டுள்ளனர்.
