இந்த ஆண்டு ஏற்பட்டுள்ள ‘சூப்பர்-எல் நினோ’ (super-El Niño) நிகழ்வால் உருவாகும் கடும் வெப்பம் காரணமாக, 2027 பெப்ரவரி வரையிலான ஆறு மாத காலத்தில் உலகம் முழுவதும் 4,51,000 கூடுதல் உயிரிழப்புகள் ஏற்படக்கூடும் என்று சிகாகோ பல்கலைக்கழகத்தின் காலநிலைத் தாக்க ஆய்வகம் (Climate Impact Lab) ஆராய்ச்சியாளர்கள் புதன்கிழமை (23) தெரிவித்தனர்.
‘கிளைமேட் இம்பாக்ட் லேப்’ (Climate Impact Lab) அமைப்பை மேற்கோள்காட்டி ரொய்ட்டர்ஸ் செய்திச் சேவை வெளியிட்ட அறிக்கை ஒன்றின்படி, சாதாரண ஆண்டுகளுடன் ஒப்பிடுகையில் கடும் வெப்பம் நிலவும் நாட்களின் எண்ணிக்கை 44% அதிகரிக்கும்.
இதனால் பல்வேறு பகுதிகளில் வெப்பம் தொடர்பான உயிரிழப்புகளுக்கான அபாயம் அதிகரிக்கும் என்றும் எதிர்பார்க்கப்படுகிறது.
2026 செப்டம்பர் முதல் 2027 பெப்ரவரி வரையிலான காலத்தில், அதிகப்படியான வெப்பம் தொடர்பான உயிரிழப்புகள் நைஜீரியாவில் மிக அதிகமாக (சுமார் 31,400 உயிரிழப்புகள்) பதிவாகும் என்று கணிக்கப்பட்டுள்ளது.
அதைத் தொடர்ந்து இந்தோனேசியாவில் 19,300 மற்றும் சூடானில் 17,600 உயிரிழப்புகள் பதிவாகக்கூடும்.
நைஜர், சாட், நைஜீரியா மற்றும் சூடான் உள்ளிட்ட ஆப்பிரிக்காவின் சாஹெல் பிராந்தியத்தில், ஆறு மாத காலப்பகுதியில் கூடுதலாக 66,800 உயிரிழப்புகள் ஏற்படக்கூடும் என்று ஆராய்ச்சியாளர்கள் மதிப்பிட்டுள்ளனர்.
தென்கிழக்கு ஆசியாவில், பிலிப்பைன்ஸ், வியட்நாம், தாய்லாந்து மற்றும் கம்போடியா ஆகிய நாடுகளில் கடும் வெப்பம் தொடர்பான கூடுதல் உயிரிழப்புகள் மொத்தம் 19,400-ஆக இருக்கும் என்று கணிக்கப்பட்டுள்ளது.
எல் நினோ நிகழ்வு 2027 ஆம் ஆண்டு வரையிலும் நீடித்தால், இதனால் ஏற்படும் பாதிப்பு மேலும் அதிகரிக்கக்கூடும்.
குறிப்பாக இந்தியா மற்றும் பாகிஸ்தான் உள்ளிட்ட வட அரைக்கோள நாடுகள், தங்கள் கோடைக்காலத்தின்போது அதிக பாதிப்புக்குள்ளாகும் அபாயம் உள்ளதாக ஆராய்ச்சியாளர்கள் தெரிவித்தனர்.
அந்த அறிக்கையின்படி, இந்த ஆண்டின் எல் நினோவை “எதிர்காலத்திலிருந்து வந்த ஒரு அஞ்சல் அட்டை” என்று வர்ணித்த காலநிலை தாக்க ஆய்வகம், இது அடுத்த சில பத்தாண்டுகளில் இயல்பானதாக மாறக்கூடிய வெப்பநிலைகளைக் கொண்டுவருகிறது என்றும் கூறியுள்ளது.
வரவிருக்கும் மாதங்களில் வெப்பம் தொடர்பான உயிரிழப்பு அபாயம் மிக அதிகமாக உள்ள பகுதிகளில் அவசரக்கால நடவடிக்கைகளை மையப்படுத்துமாறு ஆராய்ச்சியாளர்கள் வலியுறுத்தினர்.
