ஜப்பானின் நிஷினில் இன்று (03) நடைபெற்ற ஆசிய விளையாட்டுப் போட்டிகளின் ஆடவர் கிரிக்கெட் பிரிவில், பங்களாதேஷை 63 ஓட்டங்கள் வித்தியாசத்தில் வீழ்த்திய இலங்கை அணி வெண்கலப் பதக்கத்தை வென்றது.
கோரோகி ஸ்போர்ட்ஸ் பூங்காவில் ஆரம்பமான இந்தப் போட்டியில் நாணய சூழற்சியில் வென்று முதலில் துடுப்பாட்டம் செய்த இலங்கை அணி, 20 ஓவர்களில் 9 விக்கெட் இழப்புக்கு 165 ஓட்டங்கள் எடுத்தது.
32 பந்துகளில் 7 பவுண்டரிகள் மற்றும் 5 சிக்ஸர்களுடன் 65 ஓட்டங்கள் குவித்த தாரிந்து ரத்நாயக்க அதிகபட்ச ஓட்டங்கள் எடுத்தவராகத் திகழ்ந்தார்.
சஹான் அராச்சிகே 37 பந்துகளில் 33 ஓட்டங்களையும், அஷென் பண்டாரா 24 பந்துகளில் 18 ஓட்டங்களையும் எடுத்தனர்.
பங்களாதேஷ் தரப்பில் மஹேதி ஹசன் மற்றும் சைஃப் ஹசன் ஆகியோர் தலா இரண்டு விக்கெட்டுகளைக் கைப்பற்றினர்.
முஸ்தாபிசுர் ரஹ்மானும் இரண்டு விக்கெட்டுகளை வீழ்த்திய அதே வேளையில், தனது மூன்று ஓவர்களில் 43 ஓட்டங்களை விட்டுக் கொடுத்தார்.
பங்களாதேஷ் தங்கள் இலக்கை நோக்கி விளையாடத் தொடங்கியதிலிருந்தே தடுமாறியது; முதல் மூன்று ஓவர்களுக்குள்ளேயே சைஃப் ஹசன், தன்சித் ஹசன் மற்றும் கேப்டன் லிட்டன் தாஸ் ஆகியோர் ஓட்டம் ஏதுமின்றி ஆட்டமிழந்தனர்.
பர்வேஸ் ஹொசைன் எமோன் 26 பந்துகளில் 20 ஓட்டங்களை எடுத்தார்.
அதேவேளையில் யாசிர் அலி 16 பந்துகளில் 21 ஓட்டங்களும், நசும் அகமட் 28 பந்துகளில் 26 ஓட்டங்களும் எடுத்தனர்.
இறுதியில் பங்களாதேஷ் அணி 17.3 ஓவர்களில் 102 ஓட்டங்களுக்கு ஆட்டமிழந்தது.
இலங்கை தரப்பில் நுவான் துஷார, தரிந்து ரத்நாயக்க, விஜயகாந்த் வியாஸ்காந்த், வனுஜா சஹான் ஆகியோர் தலா 2 விக்கெட்டுகளை வீழ்த்தினர்.
சஹான் ஆராச்சிகே மற்றும் துஷான் ஹேமந்த ஆகியோர் தலா ஒரு விக்கெட்டை வீழ்த்தினர்.
32 பந்துகளில் 65 ஓட்டங்கள் மற்றும் 2 விக்கெட்டுகளை வீழ்த்திய ரத்நாயக்கவின் பங்களிப்பு, இலங்கை அணி 63 ஓட்டங்கள் வித்தியாசத்தில் வெற்றி பெற்று வெண்கலப் பதக்கத்தை வெல்ல உதவியது.
மேலும், பங்களாதேஷை சேர்ந்த அல் இஸ்லாம் இந்த ஆட்டத்தின் மூலம் தனது டி20 சர்வதேச (T20I) கிரிக்கெட் பயணத்தைத் தொடங்கினார்.
