பிரித்தானியாவின் நாணயத்தாள்களில் இயற்கை மற்றும் வனவிலங்குகளைப் பிரதிபலிக்கும் வகையில் புதிய மாற்றங்களை மேற்கொள்ள இங்கிலாந்து வங்கி தீர்மானித்துள்ளது.
இதன்படி, அட்லாண்டிக் கடற்பறவை (Atlantic Puffin), கொட்டகை ஆந்தை (Barn Owl), மஞ்சள் வால் கொண்ட பம்பிள்பீ தேனீ (Buff-tailed Bumblebee) மற்றும் ஐரோப்பிய முள்ளம்பன்றி (European Hedgehog) ஆகிய நான்கு உயிரினங்களும் எதிர்காலத்தில் மறுவடிவமைக்கப்படும் நாணயத்தாள்களில் இடம்பெறவுள்ளன.
எனினும், எந்த விலங்கு எந்த நாணயத்தாளில் இடம்பெறும் என்பது தொடர்பில் இதுவரை இறுதி முடிவு எடுக்கப்படவில்லை.
பொதுமக்களிடையே நடத்தப்பட்ட வாக்கெடுப்பில், ஆந்தை, தேனீ மற்றும் முள்ளம்பன்றி ஆகியவை அவற்றுக்கான பிரிவுகளில் அதிக வாக்குகளைப் பெற்றுள்ளன. கடல்வாழ் உயிரினங்கள், கடற்கரைச் சூழல் ஆகியவற்றைக் கொண்டாடுவதுடன் நாணயத்தாள்களில் பன்முகத்தன்மையை ஏற்படுத்தும் நோக்கில் அட்லாண்டிக் கடற்பறவையும் தெரிவு செய்யப்பட்டுள்ளதாக இங்கிலாந்து வங்கி தெரிவித்துள்ளது.
இதுவரை நாணயத்தாள்களில் இடம்பெற்றிருந்த வின்ஸ்டன் சர்ச்சில் உள்ளிட்ட வரலாற்றுச் சிறப்புமிக்க நபர்களுக்குப் பதிலாக வனவிலங்குகளை இடம்பெறச் செய்யும் இந்தத் தீர்மானம், சில முன்னணி அரசியல்வாதிகளிடையே அதிருப்தியை ஏற்படுத்தியுள்ளது.
“பிரித்தானியாவில் காணப்படும் வனவிலங்குகளின் பெரும் பன்முகத்தன்மையை வெளிப்படுத்துவதுடன், நாணயத்தாள்களின் பாதுகாப்பையும் மேம்படுத்தும் வகையில் நான்கு தனித்துவமான மற்றும் ஊக்கமளிக்கும் உயிரினங்களைத் தெரிவு செய்துள்ளோம்” என இங்கிலாந்து வங்கியின் தலைமைப் பணக் காசாளர் விக்டோரியா கிளீலண்ட் தெரிவித்துள்ளார்.
வனவிலங்கு நிபுணர்கள் அடங்கிய குழுவொன்று பாலூட்டிகள், பறவைகள், இருவாழ்விகள், பூச்சிகள் மற்றும் மீன்கள் உள்ளிட்ட உயிரினங்களில் இருந்து 18 உயிரினங்களைத் தேர்ந்தெடுத்து பொதுமக்களின் பரிந்துரைக்காக முன்வைத்தது.
இதனைத் தொடர்ந்து நடத்தப்பட்ட வாக்கெடுப்பில், 478,531 பேர் பங்கேற்று மொத்தம் 2.5 மில்லியனுக்கும் அதிகமான வாக்குகளைப் பதிவு செய்துள்ளனர். வனவிலங்கு ஆர்வலர்கள் முதல் ஆரம்பப் பாடசாலை மாணவர்கள் வரையிலான பல்வேறு தரப்பினரும் இதில் பங்கேற்றுள்ளனர்.
