இஸ்ரேலில் இருந்து ஆஸ்திரியா நோக்கிச் சென்ற ஆஸ்திரியன் ஏர்லைன்ஸ் விமானம் வெடிகுண்டு மிரட்டல் குறித்த தகவலைத் தொடர்ந்து, பல்கேரியாவிற்குத் திருப்பிவிடப்பட்டது.
ஞாயிற்றுக்கிழமை இரவு டெல் அவீவிலிருந்து வியன்னாவிற்குச் சென்றுகொண்டிருந்த ஏர்பஸ் A320 விமானம், சோஃபியாவில் அவசரகால தரையிறக்கம் செய்ததாகவும், அங்கு பயணிகள் பாதுகாப்பாக வெளியேற்றப்பட்டனர் என்றும் பல்கேரிய போக்குவரத்து அமைச்சகம் வெளியிட்டுள்ள அறிக்கையில் தெரிவித்துள்ளது.
பயணிகள் விமானத்திற்குப் பாதுகாப்பு அளிப்பதற்காக, பல்கேரிய விமானப்படை ஒரு மிக்-29 ரக போர் விமானத்தை விரைந்து அனுப்பியதாக போக்குவரத்து அமைச்சகம் தெரிவித்தது.
இதனால், யாருக்கும் காயம் ஏற்படவில்லை எனத் தெரிவிக்கப்பட்டுள்ள நிலையில், விசாரணை தொடங்கப்பட்டுள்ளது.
கடந்த மாதம் டெல் அவிவ் நோக்கிச் சென்ற ‘ஃப்ளைதுபாய்’ (Flydubai) விமானத்தில், விமானி ஒருவர் விமானத் தலைவரைத் தாக்கி, விமானத்தைக் கடத்த முயன்றார்.
இதனைத் தொடர்ந்து, விமானக் குழுவினரும் பயணிகளும் இணைந்து அவரை அடக்கியதையடுத்து, அந்த விமானம் சவுதி அரேபியாவில் பாதுகாப்பாகத் தரையிறக்கப்பட்டது.
பல்கேரிய மற்றும் இஸ்ரேலிய ஊடகங்கள், வெடிகுண்டு மிரட்டல் விடுக்கப்பட்டதாகத் தெரிவித்துள்ளன.
ஆஸ்திரியன் ஏர்லைன்ஸ் நிறுவனம், மிரட்டல் விடுக்கப்பட்டதை உறுதிப்படுத்தியுள்ளது, ஆனால் கூடுதல் விவரங்களை வெளியிடவில்லை.
அந்த விமானத்தில் 51 பயணிகள் மற்றும் ஆறு பணியாளர்கள் இருந்ததாக அந்நிறுவனத்தின் செய்தித் தொடர்பாளர் ஏஎஃப்பி (AFP) செய்தி முகமையிடம் தெரிவித்தார்.
எச்சரிக்கை விடுக்கப்பட்ட சுமார் 30 நிமிடங்களுக்குப் பிறகு, சோபியாவில் விமானம் தரையிறங்கியதும், அதிகாரிகள் அதில் பாதுகாப்புச் சோதனையை மேற்கொண்டனர்.
இந்த விமானம் ருமேனியா வான்வெளியில் பறந்துகொண்டிருந்தபோது, சோபியாவை நோக்கித் திருப்பிவிடப்பட்டது.
விமானப் பயணக் கண்காணிப்புத் தரவுகளின்படி, ஆஸ்திரியன் ஏர்லைன்ஸ் 82 விமானம் ஞாயிற்றுக்கிழமை மாலை டெல் அவிவில் உள்ள பென் குரியன் விமான நிலையத்திலிருந்து புறப்பட்டு, மூன்று மணி நேரம் கழித்து சோஃபியாவில் உள்ள வாசில் லெவ்ஸ்கி விமான நிலையத்தில் தரையிறங்கியது.
