இஸ்ரேலில் அரசியல் முட்டுக்கட்டை: ஆட்சியைத் தீர்மானிக்கும் சக்தியாக அரபுக் கட்சிகள்?

இஸ்ரேலிய வாக்காளர்கள் அந்நாட்டை ஒரு அரசியல் முட்டுக்கட்டை நிலைக்குத் தள்ளியுள்ளனர். 

தற்போதைய பிரதமர் பெஞ்சமின் நெதன்யாகு (Benjamin Netanyahu) மற்றும் அவருக்குப் போட்டியாளராக உள்ள காடி ஐசென்கோட் (Gadi Eisenkot) ஆகியோர் தலைமையிலான இரண்டு முக்கிய அரசியல் கூட்டணிகளில் எதற்கும், அரசாங்கத்தை அமைப்பதற்குத் தேவையான எண்ணிக்கையிலான இடங்கள் கிடைத்ததாகத் தெரியவில்லை.

இந்த முட்டுக்கட்டையை உடைப்பதற்கான திறவுகோல், நீண்டகாலமாக “அரசியல் தீண்டத்தகாதவர்கள்” என்று நடத்தப்பட்டு வந்தவர்களின் கைகளில் இருக்கலாம்.

அதாவது, இஸ்ரேலில் வாழும் பாலஸ்தீன குடிமக்களைப் பிரதிநிதித்துவப்படுத்தும் அரபு கட்சிகளின் கைகளில். 

யூத அரசியல் கட்சிகள் இவர்களை அடிக்கடி யூத அரசின் எதிரிகள் என்று ஏளனம் செய்து வந்துள்ளன.

இந்தத் தேர்தலில் 1999-ஆம் ஆண்டிற்குப் பிறகு மிக அதிக அளவாக, 77.7 சதவீத வாக்குகள் பதிவாகின. 

குறிப்பாக, யூத இஸ்ரேலியர்களை விட வழக்கமாக மிகக் குறைந்த அளவே வாக்களித்து வந்த நாட்டின் அரபு மக்கள் மத்தியில் இந்த வாக்குப்பதிவு அதிகரிப்பு குறிப்பிடத்தக்க வகையில் அமைந்தது.

அரபு சமூகங்களில் வாக்குப்பதிவு 75 சதவீதத்தைத் தாண்டியுள்ளதாக அரபு கட்சிகள் தெரிவித்துள்ளன.

‘ஜொயிண்ட் லிஸ்ட்’ (Joint List) மற்றும் ‘ரா ஆம்’ (Ra’am) ஆகிய இரண்டு முக்கிய அரபு அரசியல் குழுக்களும் இணைந்து மொத்தம் 17 முதல் 19 இடங்களைப் பெறக்கூடும் என்று கணிக்கப்பட்டுள்ளது; இது அவர்களின் மிக வலுவான தேர்தல் செயல்பாடாக அமையக்கூடும்.

அரபு இஸ்ரேலியர்கள்

பெரும்பாலான அரபு இஸ்ரேலியர்கள், 1948-ல் இஸ்ரேல் அரசு உருவாக்கப்பட்டபோது ஏற்பட்ட போரின்போது, ​​இஸ்ரேலாக மாறிய நிலப்பரப்பிலேயே தங்கிவிட்ட பாலஸ்தீனியர்களின் வழித்தோன்றல்கள் ஆவர். 

அந்தப் போரின்போது இலட்சக்கணக்கான பாலஸ்தீனியர்கள் இடம்பெயர நேரிட்டது அல்லது தங்கள் வீடுகளை விட்டு வெளியேற வேண்டிய கட்டாயம் ஏற்பட்டது.

இஸ்ரேலின் தற்போதைய அரசாங்கம், அரபு மக்களின் அரசியல் பங்கேற்பை அந்நாட்டின் யூத அடையாளத்திற்கு விடுக்கப்படும் அச்சுறுத்தலாக அடிக்கடி சித்தரித்து வந்துள்ளது. 

அண்மையில், தனது அரசியல் எதிரிகள் அரபு கட்சிகளுடன் இணைந்து “ஆபத்தான அரசாங்கம்” என்று தான் அழைக்கும் ஒரு ஆட்சியை அமைக்கத் திட்டமிட்டுள்ளதாக நெதன்யாகு குற்றம் சாட்டினார்.

இஸ்ரேலில் அரபு தலைமையிலான அரசியல் கட்சிகள், அமைப்பு ரீதியான பாகுபாட்டை எதிர்த்துப் போராடுவதிலும், பாலஸ்தீனிய சமூகங்கள் தனித்தனிப் பகுதிகளாகப் பிரிவதை எதிர்ப்பதிலும், சமமான குடிமை உரிமைகளைப் பாதுகாப்பதிலும் பெருமளவில் கவனம் செலுத்தி வருகின்றன.

இந்தக் கட்சிகள் இஸ்ரேலின் மக்கள் தொகையில் சுமார் 21 சதவீதத்தைப் பிரதிநிதித்துவப்படுத்துகின்றன. 

இவர்களில் பல அரபு குடிமக்கள் தங்களை இஸ்ரேலின் பாலஸ்தீன குடிமக்களாக அடையாளப்படுத்திக் கொள்கின்றனர். 

அவர்களுக்கு வாக்குரிமை இருந்தாலும், அவர்கள் தொடர்ந்து குறிப்பிடத்தக்க சமூக-பொருளாதார ஏற்றத்தாழ்வுகளை எதிர்கொள்கின்றனர்.

நில ஒதுக்கீட்டில் கட்டுப்பாடுகளுக்கு உள்ளாகின்றனர்; மேலும், இவர்களின் சமமற்ற நிலையை உறுதிப்படுத்தும் வகையிலான சட்டங்களுக்கு உட்படுத்தப்படுகின்றனர் என்று விமர்சகர்கள் சுட்டிக்காட்டுகின்றனர்.

இதற்கு ஒரு முக்கிய உதாரணம் 2018-ஆம் ஆண்டின் ‘தேசிய-அரசுச் சட்டம்’ (Nation-State Law) ஆகும்; இது இஸ்ரேலை யூத மக்களுக்கான தேசிய-அரசாக வரையறுக்கிறது. 

இத்தகைய நடவடிக்கைகள், தங்களை இரண்டாம் தர குடிமக்களாக மாற்றும் வகையில் அமைகின்றன என்று விமர்சகர்களும் மனித உரிமை அமைப்புகளும் வாதிடுகின்றன.

இந்த நிலையில் யூதத் தலைமையைச் கொண்ட இரு முக்கிய அரசியல் கூட்டணிகளும் நடந்து முடிந்த தேர்தலில் தலா 51 முதல் 55 இடங்களைப் பெறும் என்று எதிர்பார்க்கப்படுகிறது. 

இது, இஸ்ரேலிய நாடாளுமன்றமான ‘நெசெட்’ (Knesset)-இல் பெரும்பான்மைக்குத் தேவையான 61 இடங்களை விடக் குறைவான எண்ணிக்கையாகும்.

அரபு கட்சிகளை சார்ந்திருக்கும் நிலை

தேர்தல் முடிவை யூத வலதுசாரிகளுக்கான ஆதரவாக நெதன்யாகு சித்தரித்துள்ளார்; அதேவேளையில், பதவியில் இருந்தவருக்கு எதிரான வாக்காக ஐசென்கோட் இதைக் குறிப்பிட்டுள்ளார்.

ஆனால், வெறும் சொல்லாடல்களுக்கு அப்பால், இந்த முடிவு இரு தலைவர்களுக்கும் மிக மோசமான சூழலையே உருவாக்குகிறது: அதுதான் அரசாங்கத்தை அமைப்பதற்கு அரபு கட்சிகளைச் சார்ந்திருக்க வேண்டிய நிலை.

நெதன்யாகு இந்த கட்சிகளின் தீவிர எதிர்ப்பாளராக இருந்து வருகிறார்; அவர் முன்னெடுத்த பிரச்சாரத்தை, “வலதுசாரி அல்லது பாலஸ்தீனம்” போன்ற முழக்கங்களின் காரணமாக, இனவெறிக்கு இணையான ஒன்று என்று விமர்சகர்கள் வர்ணித்துள்ளனர்.

இதற்கிடையில், அரபு கட்சிகளுடனான எந்தவொரு உடன்படிக்கைக்கும் ஐசென்கோட் சில நிபந்தனைகளை விதித்துள்ளார்.

இது பேச்சுவார்த்தைகள் தொடங்குவதற்கு முன்பே அவற்றைச் சிக்கலாக்கக்கூடும். 

அந்த நிபந்தனைகள் பின் வருமாறு:

இஸ்ரேலை ஒரு யூத மற்றும் ஜனநாயக நாடாக அங்கீகரித்தல்; இஸ்ரேலின் சுதந்திரப் பிரகடனத்தில் பொதிந்துள்ள விழுமியங்களை ஏற்றுக்கொள்வது; இஸ்ரேலில் வசிக்கும் பாலஸ்தீன குடிமக்களுக்கு (பொதுவாக கட்டாய இராணுவ சேவையிலிருந்து விலக்கு அளிக்கப்பட்டிருக்கும் நிலையில்) கட்டாய இராணுவ சேவையை அமுல்படுத்துவதை ஏற்றுக்கொள்வது மற்றும் ஹமாஸ் அமைப்பை ஒரு பயங்கரவாத அமைப்பாகத் தெளிவாகக் கண்டிப்பது.

அரபு கட்சிகள் இந்த நிபந்தனைகளை ஏற்றுக்கொள்வது கடினமாக இருக்கலாம்; இது, சிக்கல்கள் நிறைந்த பேச்சுவார்த்தை சுற்றுக்கு வழிவகுக்கக்கூடும்.

ஐசென்கோட் மற்றும் நெதன்யாகு ஆகிய இருவருமே அரபு கட்சிகளுடன் கூட்டணி அமைக்கும் யோசனையை நிராகரித்துள்ளனர்.

இத்தகைய கூட்டணி தங்கள் வலதுசாரி வாக்காளர்களைத் தங்களுக்கு எதிராகத் திருப்பிவிடக்கூடும் என்று அவர்கள் அஞ்சுகின்றனர்.

எதிரியுடன் கைகோர்க்கப் போவது யார்?

இஸ்ரேலிய அரசியல் என்பது தேர்தல்களைத் தாண்டி, பேச்சுவார்த்தைகளையும் உள்ளடக்கியது. 

நெதன்யாகு இவ்வளவு நீண்ட காலம் அதிகாரத்தில் நீடித்திருப்பதற்கு, அவரது அபாரமான பேச்சுவார்த்தைத்திறனும், தனது அரசியல் எதிரிகளைத் தந்திரமாக முறியடிக்கும் ஆற்றலுமே முக்கிய காரணங்களாகும். 

ஒரு புதிய அரசாங்கத்தை அமைப்பதற்கு முன்னதாக, பல வாரங்கள் அல்லது மாதங்கள் நீடிக்கக்கூடிய கடினமான பேச்சுவார்த்தைகளை அந்த நாடு இப்போது எதிர்கொள்ள வேண்டியிருக்கலாம்.

மிகவும் நம்பிக்கையான பார்வையாளர்கள் கூட நெதன்யாகுவுக்கும் அரபு கட்சிகளுக்கும் இடையே ஒரு கூட்டணியை கற்பனை செய்து பார்ப்பதற்கு சிரமப்படுவார்கள். 

அவரது பிரச்சாரத்தில், இஸ்ரேலின் அரபு குடிமக்களைப் பற்றிய கடுமையான சொல்லாடல்களும், விமர்சகர்கள் அச்சமூட்டும் பிரச்சாரம் என்று விவரித்தவையும் இடம்பெற்றன. 

தனது செய்தியை ஆழமாகப் பதியவைக்க, அவரது பிரச்சாரக் குழு, இஸ்ரேலின் மிகப்பெரிய அரபு நகரமான நாசரேத்தின் பிரதான நுழைவாயில் உட்பட பல இடங்களில் விளம்பரப் பலகைகளை அமைத்தது. 

அந்த விளம்பரப் பலகைகள், வாக்காளர்களுக்கு “வலதுசாரி அல்லது பாலஸ்தீனம்” என்ற தேர்வை வழங்கின.

வலதுசாரி அரசியல்வாதிகள் உட்பட முக்கிய எதிர்க்கட்சி பிரமுகர்களை, வலதுசாரியாக அல்லாமல் பாலஸ்தீனத்தைப் பிரதிநிதித்துவப்படுத்துபவர்களாகச் சித்தரித்தன.

நெதன்யாகுவின் பிரச்சாரக் குழு, தனது எதிர்ப்பாளர்கள் அரபுத் தலைவர்களைக் கட்டித் தழுவுவது போல சித்தரிக்கும் செயற்கை நுண்ணறிவு மூலம் உருவாக்கப்பட்ட காணொளிகளையும் பயன்படுத்தி, அரபு கட்சிகளுடனான ஒத்துழைப்பை ஒரு அரசியல் சுமையாகக் காட்டும் தனது முயற்சியை வலுப்படுத்தியுள்ளது.

இரண்டு முக்கிய அரபு அரசியல் குழுக்களில் சிறியதான ‘ரா ஆம்’ அமைப்புடனும் அதன் தலைவர் மன்சூர் அப்பாஸுடனும் பேச்சுவார்த்தை நடத்துவது ஐசன்கோட்டிற்கு எளிதாக இருக்கலாம். 

அப்பாஸ் ஏற்கனவே 2021-22ல் நஃப்தாலி பென்னட் தலைமையிலான வலதுசாரி அரசாங்கத்தில் பங்கேற்றுள்ளார். 

மேலும், அவருக்கு ஒரு யூத சியோனிசத் துணைத் தலைவரும் உள்ளார், அத்துடன் அவர் அரசியல் சமரசங்கள் செய்துகொள்ளும் விருப்பத்தையும் வெளிப்படுத்தியுள்ளார்.

பிரதிநிதித்துவம் மட்டும் அல்லாமல் அரசியலில் செல்வாக்கு

நெதன்யாகு மற்றும் அவரது தீவிர நிலைப்பாடு கொண்ட அமைச்சர்களான பெசலெல் ஸ்மோட்ரிச், இடாமர் பென்-க்விர் ஆகியோரைப் பதவியிலிருந்து அகற்ற விரும்புவதாகக் கூறி, தனது முன்னுரிமைகளை அப்பாஸ் செவ்வாய்க்கிழமையன்று தெளிவுபடுத்தினார்.

தேர்தலுக்குப் பிறகு, ஐசென்கோட் மற்றும் பிற எதிர்க்கட்சித் தலைவர்கள் தனது கட்சியுடன் கூட்டணி அமைப்பதற்கு அதிக வாய்ப்பிருக்கலாம் என்று அப்பாஸ் கருதுகிறார். 

அடுத்த அரசாங்கத்தில் இடம்பெற வேண்டும் என்ற தனது விருப்பத்தை அவர் மறைக்காமல் வெளிப்படுத்தியுள்ளார்.

11 அல்லது அதற்கு மேற்பட்ட இடங்களைக் கைப்பற்றும் என்று எதிர்பார்க்கப்படும் ‘ஜொயிண்ட் லிஸ்ட்’ (Joint List) கூட்டணியுடனான பேச்சுவார்த்தைகள் மிகவும் கடினமானதாக அமையக்கூடும்.

 ‘ஜொயிண்ட் லிஸ்ட்’ கூட்டணியில் மிகப்பெரிய பிரிவாக உள்ள ‘ஹடாஷ்’ (Hadash) என்ற சோசலிசக் கட்சியின் பொதுச் செயலாளர் அம்ஜாத் ஷ்பிதாவை மேற்கோள் காட்டி ‘தி கார்டியன்’ நாளிதழ் செய்தி வெளியிட்டுள்ளது. 

அதன்படி, கூட்டணிப் பேச்சுவார்த்தைகளின் போது நிபந்தனைகளை விதிக்கும் நிலையில் ஐசென்கோட் (Eisenkot) இருக்க மாட்டார் என்று அவர் கூறியுள்ளார்.

இதுவே இஸ்ரேலின் தேர்தல் பிந்தைய அரசியலின் மிக முக்கியமான யதார்த்தமாக இருக்கலாம். 

நீண்டகாலமாக முதன்மை அரசியல் நீரோட்டத்திலிருந்து ஓரங்கட்டப்பட்டிருந்த அரபு கட்சிகள், இப்போது ஆட்சியைத் தீர்மானிக்கும் சக்திகளாக உருவெடுக்கக்கூடும். 

அதே சமயம், அவற்றை இதுவரை ஓரங்கட்டி வைத்திருந்த அதே கருத்தியல் வேறுபாடுகளும் அரசியல் கணக்கீடுகளும், எந்தவொரு முக்கிய அரசியல் கூட்டணியும் தேர்தல் எண்களை ஒரு செயல்படக்கூடிய அரசாங்கமாக மாற்றுவதைக் கடினமாக்கக்கூடும்.