ஐரோப்பாவில் கொதிக்கும் மக்கள் கோபம்: பிரான்ஸ் முதல் அல்பேனியா வரை வீதிகளில் நடப்பது என்ன?

• அட்லாண்டிக் முதல் ஆல்ப்ஸ் வரை வீதிகளில் இறங்கிய லட்சக்கணக்கான சாமானியர்கள்
• விலைவாசி உயர்வு, வீடற்ற நிலை மற்றும் ஊதியத் தேக்கத்தால் கருகும் ஐரோப்பியக் கனவு

ஐரோப்பிய நாடுகள் முழுவதும் மக்கள் போராட்டத் தீ வேகமாகப் பரவிக்கொண்டிருக்கிறது. விண்ணைத் தொடும் எரிபொருள் விலை, எட்டாக்கனியாகும் வீட்டு வாடகை, போதிய வசதிகள் இல்லாத பள்ளிகள் மற்றும் இளைஞர்களின் எதிர்காலம் குறித்த அச்சம் எனப் பல்வேறு பிரச்சினைகள் சாமானியர்களின் வீடுகளுக்குள் நுழைந்துள்ளன. இப்போது அவை அனைத்தும் தெருக்களில் மாபெரும் போராட்டங்களாக உருவெடுத்துள்ளன.

ஐரோப்பாவை வெளியிலிருந்து பார்க்கும்போது, பனிமூடிய வீதிகளும் மினுமினுக்கும் கோபுரங்களும் வசந்தத்தின் அடையாளங்களாகவே காட்சி அளிக்கின்றன. ஆனால், அந்த அழகிய சுவர்களுக்குப் பின்னால் லட்சக்கணக்கான சாமானிய மனிதர்களின் வீடுகளில் அடுப்புகள் எரியாமல் முடங்கியுள்ளன. “அட்லாண்டிக் கடற்கரை முதல் ஆல்ப்ஸ் மலைத்தொடர் வரை எங்களால் இனி வாழ முடியாது” என்ற ஒற்றைக் குரல் இன்று ஐரோப்பா முழுவதும் எதிரொலிக்கத் தொடங்கியுள்ளது. ஒரு காலத்தில் உலக நாடுகளுக்குப் பொருளாதாரப் பாடங்களைக் கற்றுக்கொடுத்த ஐரோப்பிய வல்லரசுகள், சொந்த நாட்டு மக்களின் கோப அலைகளுக்குப் பதில் சொல்ல முடியாமல் திணறி நிற்கின்றன.

முக்கியப் புள்ளிவிவரங்கள்: ஒரு பார்வையில்

பரவலான கொந்தளிப்பு: பிரான்ஸ், இத்தாலி, ஸ்பெயின், போர்ச்சுகல், அல்பேனியா உள்ளிட்ட நாடுகளின் பல பிரதான நகரங்களில் பல வாரங்களாகப் போராட்டங்கள் தீவிரமடைந்துள்ளன. சில இடங்களில் மோதல்கள், கடைகள் சேதப்படுத்தப்படுதல் மற்றும் தீவிரக் கைது நடவடிக்கைகள் பதிவாகியுள்ளன.

கல்வி மற்றும் வாழ்வாதார நெருக்கடி: பிரான்ஸில் பள்ளி உள்கட்டமைப்பு மற்றும் ஆசிரியர் பற்றாக்குறைக்கு எதிராகவும், இத்தாலியில் குறைந்த ஊதியம், வேலைவாய்ப்பின்மை மற்றும் மருத்துவ வசதிக் குறைபாடுகளுக்கு எதிராகவும் பொதுமக்கள் திரண்டுள்ளனர்.

அரசியல் மாற்றம் கோரும் அல்பேனியா: தலைநகர் டிரானாவில் ஊழல் குற்றச்சாட்டுகளுக்கு எதிராகவும், பிரதமர் எடி ராமா பதவி விலகக் கோரியும் மாணவர்கள் தீவிரப் போராட்டத்தில் ஈடுபட்டுள்ளனர்.

வீட்டு வசதிச் சீர்திருத்தங்கள்: ஸ்பெயின் மற்றும் போர்ச்சுகல் ஆகிய நாடுகளில் எட்டாக்கனியாக மாறியுள்ள வீட்டு வாடகையைக் கட்டுப்படுத்தக் கோரிப் போராட்டங்கள் முன்னெடுக்கப்பட்டுள்ளன.

வளரும் இளைஞர் அதிருப்தி: ஐரோப்பாவில் வாழ்க்கைச் செலவு, கல்வி மற்றும் பொதுச் சேவைகள் தொடர்பாக இளைஞர்களிடையே அதிருப்தி அதிகரித்து வருவதாக ஆய்வாளர்கள் சுட்டிக்காட்டுகின்றனர்.

முதலாளித்துவத்தின் வீழ்ச்சியும் போராட்டத்திற்கான பின்னணியும்

மேற்கத்திய நாடுகளின் உண்மை முகம் இன்று வறுமை, வேலையின்மை மற்றும் வாழ்க்கைச் நிச்சயமின்மையால் வெளிப்பட்டு வருகிறது. இப்போராட்டங்கள் உருவெடுக்கப் பல ஆழமான கட்டமைப்புச் சிக்கல்கள் காரணமாக அமைந்துள்ளன.

எரிபொருள் மற்றும் புவிசார் அரசியல்: உக்ரைன்–ரஷ்யப் போர் மற்றும் மத்திய கிழக்கு மோதல்களால் மலிவான கச்சா எண்ணெய் மற்றும் இயற்கை எரிவாயு விநியோகம் தடைபட்டு, உற்பத்தி மற்றும் வாழ்க்கைச் செலவு பல மடங்கு உயர்ந்தது.

பணவீக்கமும் வீட்டு வாடகை உயர்வும்: அத்தியாவசியப் பொருட்களின் விலை உயர்வால் மக்களின் ஊதியம் உணவிற்கும் வாடகைக்குமே சரியாக உள்ளது. ஸ்பெயின், போர்ச்சுகல் போன்ற நாடுகளில் வாடகை கட்டுக்கடங்காமல் உயர்ந்ததால், எளிய மக்கள் சாலையோரங்களிலும் கூடாரங்களிலும் தங்கும் அவலம் ஏற்பட்டுள்ளது.

ஊதியத் தேக்க நிலையும் அரசுச் செலவினக் கட்டுப்பாடுகளும்: விலைவாசி 30% வரை உயர்ந்த நிலையிலும் தொழிலாளர்களின் ஊதியம் உயரவில்லை. மாறாக, நிதிப் பற்றாக்குறையைக் குறைக்கக் கல்வி, மருத்துவம் மற்றும் ஓய்வூதியத் திட்டங்களில் அரசுகள் கட்டுப்பாடுகளை மேற்கொண்டது மக்களின் கோபத்தை உச்சத்திற்குக் கொண்டு சென்றது.

பிரான்ஸ்: மாணவர் எழுச்சி, வன்முறை மற்றும் ட்ரம்ப்பின் கருத்து

இந்தப் போராட்ட அலையின் முதன்மை மையப்புள்ளியாகப் பிரான்ஸ் விளங்குகிறது. செப்டம்பர் மாத இறுதியில் பள்ளி மாணவர்கள் வகுப்புகளைப் புறக்கணித்து வீதிக்கு வரத் தொடங்கினர். போதிய ஆசிரியர்கள் இல்லாமை, மோசமான உள்கட்டமைப்பு மற்றும் கல்வித்துறைக்கான நிதி ஒதுக்கீட்டுக் குறைப்பு ஆகியவற்றுக்கு எதிராக இப்போராட்டம் தொடங்கியது. எனினும், எரிபொருள் மற்றும் உணவுப் பொருட்களின் விலையேற்றத்தால் ஏற்கெனவே கொதித்திருந்த பொதுமக்கள் மாணவர்களுடன் கைகோர்த்ததால், இது நாடு தழுவிய மக்கள் எழுச்சியாக மாறியது.

பாரிஸ் மற்றும் மார்சாய் நகரங்களில் வெடித்த வன்முறைகளைக் கட்டுப்படுத்த 70,000 பொலிஸார் குவிக்கப்பட்டனர். கண்ணீர்ப்புகைக் குண்டுகள் மற்றும் நீரைப் பீச்சியடிக்கும் வாகனங்கள் பயன்படுத்தப்பட்டதில் 1,300-க்கும் மேற்பட்டோர் கைது செய்யப்பட்டுள்ளனர். 53 பொலிஸார் காயமடைந்தனர்.

இதனிடையே, பிரான்ஸ் நிலவரம் குறித்துக் கருத்துத் தெரிவித்த அமெரிக்க ஜனாதிபதி ட்ரம்ப், “எல்லைகளைத் திறந்ததால்தான் பிரான்ஸ் பற்றி எரிகிறது” என விமர்சித்தார். ட்ரம்ப்பின் இந்த விமர்சனங்களைப் பிரெஞ்சு ஜனாதிபதி இமானுவேல் மேக்ரான் ஏற்கெனவே கண்டித்திருந்தார். போராட்டங்களைத் தணிக்க அரசு 5 பில்லியன் யூரோ செலவில் கல்விச் சீர்திருத்தங்களை அறிவித்த போதிலும், அது போதுமானதல்ல எனக் கூறி ஆசிரியர்களும் மாணவர்களும் போராட்டங்களைத் தொடர்வதாக அறிவித்துள்ளனர். இந்தக் கொந்தளிப்பான சூழல் வலதுசாரித் தலைவர் மரீன் லு பென்னுக்குச் சாதகமான அரசியல் சூழலை உருவாக்கியுள்ளது.

ஸ்பெயின்: மூதாட்டியின் மரணத்தால் வெடித்த அவசரத் தேர்தல்

ஸ்பெயின் தலைநகர் மேட்ரிட்டில், 70 ஆண்டுகளுக்கும் மேலாக வசித்து வந்த 87 வயது மூதாட்டி மரியா மரிகார்மேன் அபாஸ்கல், உயர்த்தப்பட்ட வாடகையைச் செலுத்த முடியவில்லை எனக் கூறி முதலீட்டு நிறுவனத்தாலும் பொலிஸாரினாலும் பலவந்தமாக வெளியேற்றப்பட்டு உயிரிழந்தார். இச்சம்பவம் நாட்டையே உலுக்கியதுடன், “இது கொலையே” என மக்கள் சதுக்கத்தில் திரண்டு போராட்டத்தில் இறங்கினர்.

வீட்டு வசதி நெருக்கடியைச் சமாளிக்க அரசு கொண்டுவந்த அவசரச் சட்டமூலங்கள் தோற்கடிக்கப்பட்டதால், நாடாளுமன்றம் கலைக்கப்பட்டு நவம்பர் 29 அன்று அவசரப் பொதுத்தேர்தல் அறிவிக்கப்பட்டுள்ளது. மேலும், வீட்டு வசதிச் சீர்திருத்தங்களை வலியுறுத்தி நவம்பர் 11 அன்று நாடு தழுவிய பொது வேலைநிறுத்தத்திற்கும் அழைப்பு விடுக்கப்பட்டுள்ளது.

போர்ச்சுகல், இத்தாலி மற்றும் அல்பேனியா: பரவும் போராட்டத் தீ

போர்ச்சுகல்: லிஸ்பன் மற்றும் போர்ட்டோவில் வீடற்றோர் அமைத்திருந்த தற்காலிகக் கூடாரங்களைப் பொலிஸார் அகற்றியதை எதிர்த்து ஆயிரக்கணக்கானோர் நாடாளுமன்றத்தை முற்றுகையிட்டனர். 2017 முதல் வீட்டு வாடகை இரட்டிப்பாகியுள்ள நிலையில், அரசாங்கத்தின் புதிய வரவு–செலவுத் திட்ட வரைவிற்கு எதிராக மக்கள் வீதியில் நின்று போராடி வருகின்றனர்.

இத்தாலி: குறைந்த ஊதியம், பணவீக்கம் மற்றும் மருத்துவ வசதிகள் சீர்குலைந்ததைக் கண்டித்து ரோம் மற்றும் மிலான் நகரங்களில் ஆர்ப்பாட்டங்கள் நடைபெற்று வருகின்றன. சில இடங்களில் காவல்துறையினருடன் மோதல்கள் பதிவாகியுள்ளன.

அல்பேனியா: தலைநகர் டிரானாவில் ‘பிளமிங்கோ புரட்சி’ என்ற பெயரில் மாணவர்கள் தீவிரப் போராட்டத்தில் ஈடுபட்டுள்ளனர். சொகுசு சுற்றுலாத் திட்டத்திற்கு அனுமதி அளித்தமை மற்றும் ஊழல் குற்றச்சாட்டுகளை முன்வைத்து, பிரதமர் எடி ராமா பதவி விலக வேண்டும் என்றும், 2027 தேர்தல் வரை தற்காலிக அரசை அமைக்க வேண்டும் என்றும் வலியுறுத்தப்பட்டு வருகிறது.

ஐரோப்பிய அரசுகள் பொருளாதார நெருக்கடியில் சிக்கியிருப்பது ஏன்?

மக்களின் கோரிக்கைகளை நிறைவேற்ற முடியாமல் ஐரோப்பிய அரசுகள் பொருளாதார நெருக்கடியில் சிக்கியிருப்பதற்கு அவற்றின் கட்டமைப்புச் சிக்கல்களே காரணமாகும். நாட்டின் மொத்த உள்நாட்டு உற்பத்தியை (GDP – Gross Domestic Product) விடக் கடன் அளவு அதிகமாக இருப்பதால் மானியங்களைக் குறைக்க வேண்டிய கட்டாயம், உழைக்கும் இளைஞர்களின் எண்ணிக்கை குறைந்து முதியோர் எண்ணிக்கை அதிகரித்ததால் உயர்ந்துள்ள ஓய்வூதியச் சுமை மற்றும் குடியேற்றக் கொள்கை நெருக்கடிகள் போன்ற காரணங்களால் ஐரோப்பிய நாடுகள் எவ்விதத் தீர்வும் காண முடியாமல் ஸ்தம்பித்துப்போயுள்ளன.

Dharmaraja Rasmila