90 வயதைக் கடந்த ஜப்பானிய உடற்கட்டழகர் தோஷிசுகே கனசாவா (Toshisuke Kanazawa), உச்சகட்ட உடல் தகுதிக்கு வயது ஒரு தடையல்ல என்பதை நிரூபிக்கும் நோக்கில், வெள்ளிக்கிழமை (30) அன்று ஸ்பெயினின் கோஸ்டா டெல் மரேஸ்மேயில் மேடையேறினார்.
சர்வதேச உடற்தகுதி மற்றும் உடற்கட்டமைப்பு கூட்டமைப்பு நடத்திய போட்டியில், 50 மற்றும் அதற்கு மேற்பட்ட வயதுடைய விளையாட்டு வீரர்களுக்கான மாஸ்டர்ஸ் பிரிவில், தன்னை விட பல பத்தாண்டுகள் இளைய போட்டியாளர்களுடன் மோதுவதற்காக, 90 வயதான அவர் சாண்டா சுசானா என்ற கடலோர நகரத்திற்குப் பயணம் செய்தார்.
மேடைக்குப் பின்னால், கனசாவா இளம் போட்டியாளர்களைப் போலவே தனது அணியினருடன் உடலைத் தயார்படுத்திக்கொண்டு, ஸ்ப்ரே டான் பூசிக்கொண்டு, பின்னர் மேடை விளக்குகளின் கீழ் தனது தசைகளை முறுக்கேற்றினார்.
கனசாவா தனது நீண்ட ஆயுளுக்கும் உடல் வலிமைக்கும் கடுமையான உணவுப் பழக்கவழக்கங்களே காரணம் என்று கூறுகிறார்.
பல தசாப்தங்களுக்கு முன்பு அவர் ஏற்படுத்திக்கொண்ட அந்த உணவு முறைதான் அவரை இன்றும் ஆரோக்கியமாகவும் வலிமையாகவும் வைத்திருக்கிறது என்றும் அவர் குறிப்பிட்டார்.
பதக்க மேடையை எட்ட முடியாவிட்டாலும், கனசாவா இந்த விளையாட்டின் எல்லைகளை விரிவுபடுத்துவதில் தொடர்ந்து கவனம் செலுத்தி வருகிறார்.
போட்டிகளிலிருந்து ஓய்வு பெறுவதற்கு முன்னதாக, இன்னும் ஒரே ஒரு முறை பங்கேற்பதற்கான திட்டங்களை அவர் முன்வைத்துள்ளார்.
தனது விடாமுயற்சி முதிய தலைமுறையினரைச் சுறுசுறுப்பாக இருக்கவும், வழக்கமான எல்லைகளுக்குச் சவால் விடுக்கவும் தூண்டும் என்று கனசாவா நம்புகிறார்.
