இலங்கையில் கொரோனா வைரஸால் பாதிக்கப்பட்டவர்களின் எண்ணிக்கை இரண்டு வாரங்களில் உச்சத்தை எட்டும் என்று பொது சுகாதார பரிசோதகர்கள் சங்கம் எச்சரித்துள்ளது.
மேலும் பி.சி.ஆர் சோதனைகள் அதிர்ச்சியூட்டும் எண்ணிக்கையிலான தொற்றுநோய்களை வெளிப்படுத்தும் என்றும் அச்சங்கம் குறிப்பிட்டுள்ளது.
கொரோனா வைரஸின் மூன்றாவது அலை ஒரு முக்கியமான கட்டத்தை எட்டியுள்ளது எனவும் சமூகத்தில் கண்டறியப்படாத வகையில் அதிக எண்ணிக்கையிலான தொற்றுடையவர்கள் இருக்க வாய்ப்புள்ளதாகவும் பொது சுகாதார பரிசோதகர்கள் சங்கம் எச்சரித்துள்ளது.
இதுவரை பாதிக்கப்பட்டவர்களில் பெரும்பாலான குடும்ப உறுப்பினர்கள் மற்றும் நெருங்கிய தொடர்புடையவர்கள் பரிசோதிக்கப்படவில்லை என்றும் அவர்களிடமும் பரிசோதனைகள் மேற்கொள்ளப்பட்டால், எண்ணிக்கை மேலும் உயரக்கூடும் என்றும் அச் சங்கத்தின் செயலாளர் மகேந்திர பாலசூரிய கூறினார்.
கொழும்பு உட்பட மேற்கு மாகாணம் இன்னும் அதிக ஆபத்துள்ள பகுதி என்றும் சமூக மட்டத்தில் பாதிக்கப்பட்டவர்களைக் கண்டறிய பரிசோதனை நடவடிக்கைகளை அதிகரிக்க வேண்டும் என்றும் கூறினார்.
மூன்றாவது அலை இருக்காது என்று கூறி சுகாதார அதிகாரிகள் பொதுமக்களை தவறாக வழிநடத்தியதாகவும் இப்போது கொழும்பின் நிலைமை அச்சுறுத்தலாக உள்ளதாகவும் மகேந்திர பாலசூரிய கூறினார்.
இதேவேளை மாகாணங்களுக்கிடையில் பயணக் கட்டுப்பாடுகளை மட்டுமே அதிகாரிகள் அமுல்படுத்துவதாகவும் கடுமையான கட்டுப்பாடுகளை அமுல்படுத்தவில்லை என்றும் அவர் குற்றம் சாட்டினார்.
இலங்கை ஒரு முக்கியமான கட்டத்தில் உள்ளது என்றும் அவர்கள் குறிப்பிட்டனர்.
