பாகிஸ்தான் சுப்பர் லீக் ரி-20 தொடரின் 25ஆவது லீக் போட்டியில், முல்தான் சுல்தான்ஸ் அணி 110 ஓட்டங்களால் அபார வெற்றிபெற்றுள்ளது.
அபுதாபியில் நேற்று (புதன்கிழமை) நடைபெற்ற இப்போட்டியில், முல்தான் சுல்தான்ஸ் அணியும் குவெட்டா கிளாடியேட்டர்ஸ் அணியும் மோதின.
இப்போட்டியில் நாணய சுழற்சியில் வெற்றிபெற்ற குவெட்டா கிளாடியேட்டர்ஸ் அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய முல்தான் சுல்தான்ஸ் அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 183 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ஷான் மசூத் 73 ஓட்டங்களையும் சார்லஸ் 47 ஓட்டங்களையும் பெற்றுக்கொண்டனர்.
குவெட்டா கிளாடியேட்டர்ஸ் அணியின் பந்துவீச்சில், குராம் செஷாட் 2 விக்கெட்டுகளையும் மொஹமட் நவாஸ், சஹீர்கான் மற்றும் ஹசன் கான் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 184 என்ற வெற்றி இலக்கை நோக்கி பதிலுக்கு களமிறங்கிய குவெட்டா கிளாடியேட்டர்ஸ் அணி, 12.1 ஓவர்கள் நிறைவில் 73 ஓட்டங்களுக்கு சுருண்டது. இதனால் முல்தான் சுல்தான்ஸ் அணி 110 ஓட்டங்களால் அபார வெற்றிபெற்றது.
இதன்போது அணியின் அதிகப்பட்ச ஓட்டங்களாக ஜெக் வெதரால்ட் 19 ஓட்டங்களையும் சப்ராஸ் அஹமட் 13 ஓட்டங்களையும் பெற்றுக்கொண்டனர்.
முல்தான் சுல்தான்ஸ் அணியின் பந்துவீச்சில், இம்ரான் தஹீர் 3 விக்கெட்டுகளையும் இம்ரான் கான் 2 விக்கெட்டுகளையும் பிளெஸிங் முஸரபானி, சொஹைல் டன்வீர், தானி ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநயகனாக 42 பந்துகளில் 4 சிக்ஸர்கள் 7 பவுண்ரிகள் அடங்களாக 73 ஓட்டங்களை பெற்றுக்கொண்ட ஷான் மசூத் தெரிவுசெய்யப்பட்டார்.
