தென்னாபிரிக்கா அணிக்கெதிரான நான்காவது ரி-20 போட்டியில், மேற்கிந்திய தீவுகள் அணி 21 ஓட்டங்களால் வெற்றிபெற்றுள்ளது.
இந்த வெற்றியின் மூலம் ஐந்து போட்டிகள் கொண்ட ரி-20 தொடர், 2-2 என்ற கணக்கில் சமநிலைப் பெற்றுள்ளது.
கிரெனடா மைதானத்தில் நடைபெற்ற இப்போட்டியில், நாணய சுழற்சியில் வெற்றிபெற்ற தென்னாபிரிக்கா அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய மேற்கிந்திய தீவுகள் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 167 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, கிய்ரன் பொலார்ட் ஆட்டமிழக்காது 51 ஓட்டங்களையும் லெண்ட்ல் சிமோன்ஸ் 47 ஓட்டங்களையும் பெற்றுக்கொண்டனர்.
தென்னாபிரிக்கா அணியின் பந்துவீச்சில், டப்ரைஸ் சம்ஸி மற்றும் ஜோர்ஸ் லிண்டே ஆகியோர் தலா 2 விக்கெட்டுகளையும் நோட்ஜே மற்றும் ரபாடா ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 168 என்ற வெற்றி இலக்கை நோக்கி பதிலுக்கு களமிறங்கிய தென்னாபிரிக்கா அணியால், நிர்ணயிக்கப்பட்ட 20 ஓவர்கள் நிறைவில் 9 விக்கெட்டுகள் இழப்புக்கு 146 ஓட்டங்களை மட்டுமே பெற முடிந்தது. இதனால் மேற்கிந்திய தீவுகள் அணி 21 ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, குயிண்டன் டி கொக் 60 ஓட்டங்களையும் ஹெய்டன் மார்கிரம் 20 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணியின் பந்துவீச்சில், டுவைன் பிராவோ 4 விக்கெட்டுகளையும் ஆந்ரே ரஸ்ஸல் 2 விக்கெட்டுகளையும் கிறிஸ் கெய்ல், ஒபேட் மெக்கொய் மற்றும் கெய்ரன் பொலார்ட் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 25 பந்துகளில் 6 சிக்ஸர்கள் 2 பவுண்ரிகள் அடங்களாக ஆட்டமிழக்காது 51 ஓட்டங்களையும் பந்துவீச்சில் 1 விக்கெட்டினையும் சாய்த்த மேற்கிந்திய தீவுகள் அணியின் தலைவர் கிய்ரன் பொலார்ட் தெரிவுசெய்யப்பட்டார்.
இரு அணிகளுக்கிடையிலான தீர்க்கமான ஐந்தாவதும் இறுதியுமான ரி-20 போட்டி, நாளை கிரெனடா மைதானத்தில் நடைபெறவுள்ளது.
