தமிழ்நாடு பிரீமியர் லீக் ரி-20 தொடரின் 27ஆவது லீக் போட்டியில், லைக்கா கோவை கிங்ஸ் அணி ஏழு ஓட்டங்களால் வெற்றிபெற்றுள்ளது.
இந்த வெற்றியின் மூலம் ஏழு புள்ளிகளுடன் புள்ளிபட்டியலில் நான்காவது இடத்திற்கு முன்னேறிய லைக்கா கோவை கிங்ஸ் அணி, வெளியேற்றுப் போட்டிக்கு முன்னேறியது.
சென்னை சிதம்பரம் மைதானத்தில் நேற்று (ஞாயிற்றுக்கிழமை) நடைபெற்ற இப்போட்டியில், லைக்கா கோவை கிங்ஸ் அணியும் நெல்லை றோயல் கிங்ஸ் அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற லைக்கா கோவை கிங்ஸ் அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய லைக்கா கோவை கிங்ஸ் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 169 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, அணித்தலைவர் ஷாருக்கான் ஆட்டமிழக்காது 64 ஓட்டங்களையும் சுரேஷ் குமார் 36 ஓட்டங்களையும் பெற்றுக்கொண்டனர்.
நெல்லை றோயல் கிங்ஸ் அணியின் பந்துவீச்சில், அப்ராஜித் 3 விக்கெட்டுகளையும் ஹரிஸ், முகுந்தன் மற்றும் சஞ்சய் யாதவ் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 170 என்ற வெற்றி இலக்கை நோக்கி பதிலுக்கு களமிறங்கிய நெல்லை றோயல் கிங்ஸ் அணியால், நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 162 ஓட்டங்களை மட்டுமே பெற முடிந்தது. இதனால் லைக்கா கோவை கிங்ஸ் அணி ஏழு ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, பாபா இந்த்ராஜித் ஆட்டமிழக்காது 49 ஓட்டங்களையும் சூர்ய பிரகாஷ் 36 ஓட்டங்களையும் பெற்றுக்கொண்டனர்.
லைக்கா கோவை கிங்ஸ் அணியின் பந்துவீச்சில், யுதீஸ்வரன் 3 விக்கெட்டுகளையும் முகிலேஷ் 2 விக்கெட்டுகளையும் அஜித் ராம் மற்றும் திவாகர் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 29 பந்துகளில் 5 சிக்ஸர்கள் 5 பவுண்ரிகள் அடங்களாக ஆட்டமிழக்காது 64 ஓட்டங்களை பெற்றுக்கொண்ட லைக்கா கோவை கிங்ஸ் அணியின் தலைவர் ஷாருக்கான் தெரிவுசெய்யப்பட்டார்.
லைக்கா கோவை கிங்ஸ் அணி, நாளை சென்னை சிதம்பரம் மைதானத்தில் நடைபெறும் வெளியேற்றுப் போட்டியில் திண்டுக்கல் டிரகன்ஸ் அணியை எதிர்கொள்ளவுள்ளது.
